ភ្នំពេញ ៖ តើខ្មែរហ្នឹងវាយ៉ាងម៉េច? តើខ្មែរហ្នឹងល្ងង់ ហីយ៉ាងម៉េច? ឱ្យអ្នកឯងយកទឹកដីបានងាយៗ?។ នេះគឺជាសំណួរ ដែល សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានចោទសួរទៅកាន់បុគ្គលម្នាក់ ដែលរស់នៅបរទេស ហើយសរសើរប្រទេសជិតខាងថា ឆ្លាតជាងខ្មែរ ហើយតែងតែបង្អាប់ខ្មែរគ្នាឯង។ 

សម្ដេចធិបតី ចោទសួរដូច្នេះ ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ក្នុងពិធីប្រគល់សញ្ញាបត្រ ជូននិស្សិតសាកលវិទ្យាល័យពុទ្ធិសាស្ត្រ ដែលបញ្ចប់ការសិក្សាដោយជោគជ័យចំនួន ៥៦១នាក់ នាព្រឹកថ្ងៃទី០៦ ខែសីហា ឆ្នាំ២០២៤។ 

ជាមួយគ្នានេះ សម្ដេចធិបតី បានពន្យល់ត្រឡប់ទៅវិញថា ខ្មែរឆ្លាត ខ្មែរមិនអន់ទេ ព្រោះខ្មែរបានសាងសង់អង្គរ និងសាងសង់សមិទ្ធផលជាក់ស្ដែងនាពេលបច្ចុប្បន្ន  ខ្មែរក៏មានសមត្ថភាពការពារទឹកដីខ្មែរមិនឱ្យបាត់បង់ងាយៗ។ ជាពិសេសខ្មែរមានសមត្ថភាពបំពេញការងារ កាន់តំណែងនៅក្រុមហ៊ុនធំៗ ដែលតំណែងនោះកាលពីអតីតកាលធ្លាប់តែជនបរទេសមកបំពេញការងារនៅកម្ពុជា៕