អាមេរិក៖ ក្រុមហ៊ុនផលិតថ្នាំជក់ដ៏ធំរបស់សហរដ្ឋអាម៉េរិក British American Tobacco បានយល់​ព្រ​ម​បង់ប្រាក់ពិន័យក្នុងទំហំទឹកប្រាក់ជាង ៦៣៥លានដុល្លារអាម៉េរិក ដល់អាជ្ញាធរ បន្ទាប់ពីក្រុមហ៊ុនបុត្រ​សម្ព័ន្ធមួយរបស់ខ្លួនបានសារភាពកំហុសស្របតាមការចោទប្រកាន់របស់អាជ្ញាធរអាម៉េរិក ជុំវិញការបំពា​ន​នឹងខ្លឹមសារទណ្ឌកម្មដោយសហគមន៍អន្តរជាតិទៅលើទីក្រុងព្យុងយ៉ាង ព្រោះតែក្រុមហ៊ុនបុត្រសម្ព័ន្ធ​ខា​ងលើ បា​នបន្ដលួចលាក់ធើ្វជំនួញដោយសម្ងាត់ជាមួយប្រទេសនេះ និងបានក្លែងបន្លំរបាយ​ការណ៍​ហិរញ្ញវត្ថុ រួមទាំងក្លែងបន្លំប្រតិបត្តិការធនាគារដើម្បីបិទបាំងដំណើរការអាជីវកម្មរបស់ខ្លួន។

យោងតាមរបាយការណ៍ស៊ើបអង្កេតរបស់អាជ្ញាធរអាម៉េរិកបានរកឃើញថា សាខាបុត្រសម្ព័ន្ធមួយរប​ស់​ក្រុមហ៊ុនផលិតថ្នាំជក់ British American Tobacco បានលួចផ្គត់ផ្គង់ផលិតផលថ្នំាជក់ទៅឱ្យប្រទេ​ស​កូរ៉េខា​ងជើងនៅចន្លោះឆ្នាំ ២០០៧ ដល់ឆ្នាំ ២០១៧ ដោយទង្វើនេះ បានចេញឆ្ងាយពីបម្រាមរបស់ស​ហគ​ម​ន៍អន្តរជាតិដែលបានដាក់ទៅលើរដ្ឋាភិបាលប្រទេសកុម្មុយនិស្តកូរ៉េខាងជើង។

ជាមួយគ្នានេះ មន្រ្តីស្ថាប័នយុត្តិធម៌អាម៉េរិក លោក Matthew Olsen បានចាត់ទុកករ​ណីប្តឹងផ្ត​ល់​មួ​​យនេះ​ ថាជាការព្រមានមួយទៅដល់បណ្ដាក្រុមហ៊ុនរបស់ខ្លួនដទៃទៀត ឱ្យបញ្ចប់សកម្មភាពអាជីវកម្ម​របស់ពួកគេជាមួយក្រុមហ៊ុនកូរ៉េខាងជើង ស្របតាមខ្លឹមសារទណ្ឌកម្មរបស់អន្តរជាតិក្រោ​មគោលបំ​ណ​ង​ដើម្បីកាត់បន្ថយលទ្ធភាពអភិវឌ្ឍគ្រាប់មីស៊ីលរបស់រដ្ឋាភិបាលទីក្រុងព្យុងយ៉ាងដែលជាការគំរាមកំហែងដ៏គ្រោះថ្នាក់មួយជុំវិញស្ថានភាពសន្ដិសុខ និងស្ថិរភាពនៅក្នុងពិភពលោក៕