ក្រសួងធម្មការ និងសាសនា នៅថ្ងៃទី២៣ ខែមីនា ឆ្នាំ២០២១នេះ បានចេញសេចក្តីណែនាំបន្ថែម ពីការការពារការឆ្លងជំងឺកូវីដ១៩ ក្នុងអំឡុងពេលឈប់សម្រាក៣ថ្ងៃ ក្នុងឱកាសបុណ្យចូលឆ្នាំថ្មី ប្រពៃណីជាតិ ដែលនឹងត្រូវចូលមកដល់នៅថ្ងៃទី១៤-១៥-១៦ ខែមេសា ឆ្នាំ២០២១ខាងមុខនេះ។

ក្រសួងសូមធ្វើការណែនាំបន្ថែម ដូចខាងក្រោម៖

១៖ ចំពោះវត្តអារាម និងវិហារសាសនាផ្សេងៗ ត្រូវធានានូវការគោរព និងអនុវត្តវិធានការសុខាភិបាលបង្ការ និងទប់ស្កាត់ការឆ្លងរាលដាលជំងឺកូវីដ-១៩ ដោយម៉ត់ចត់ ហើយត្រូវរក្សាគម្លាតសុវត្ថិភាពពីមនុស្សម្នាក់ ទៅមនុស្សម្នាក់ទៀតយ៉ាងតិចមួយម៉ែត្រកន្លះ នៅពេលឈរ អង្គុយឈររង់ចាំឈរជជែកគ្នា ឬនៅទីកន្លែងផ្សេងៗ។

២៖ អនុវត្តវិធានការ «៣ ការពារ និង ៣ កុំ» ព្រមជាមួយវិធានការសុខាភិបាលចាំបាច់ផ្សេងៗទៀត ឲ្យបានខ្ជាប់ខ្ជួន និងគ្រប់ៗគ្នា។

៣៖ ចៀសវាងនូវការរៀបចំពិធីសាសនា ឬការជួបជុំគ្នាទាំងឡាយណា ដែលមានសភាពអ៊ូអរ និងមានមនុស្សចូលរួមច្រើន។

៤៖ ត្រូវបង្កើនការប្រុងប្រយ័ត្នបន្ថែមទៀត នៅក្នុងស្ថានភាពបច្ចុប្បន្ននេះ ដោយអនុវត្តន៍ជាប្រចាំតាមសេចក្តីណែនាំរបស់ក្រសួងសុខាភិបាល និងអង្គការសុខភាពពិភពលោក (WHO)។

៥៖ ករណីមានការសង្ស័យ សូមទាក់ទងបន្ទាន់ ទៅអាជ្ញាធរមូលដ្ឋានដែលនៅជិតបំផុត ឬទំនាក់ទំនង Hotline លេខ ១១៥៕SP