រុស្ស៊ី៖ កាលពីល្ងាចថ្ងៃព្រហស្បតិ៍ទី២០ខែមេសា យន្តហោះចម្បាំងរុស្ស៊ី បានច្រឡំដៃទម្លាក់គ្រាប់បែកលើទីក្រុង Belgorod របស់ខ្លួន នៅព្រំដែនក្បែរប្រទេសអ៊ុយក្រែន ដែលបណ្តាលឲ្យមានការផ្ទុះ និងខូចខាតអគារ។នេះបើតាមសារព័ត៌មាន Tass បានដកស្រង់ប្រភពពីក្រសួងការពារជាតិរុស្ស៊ី ។

អាជ្ញាធរក្នុងតំបន់ បានរាយការណ៍ពីការបំផ្ទុះដ៏ធំមួយនៅក្នុងទីក្រុងនេះ ខណៈអភិបាលក្រុងនិយាយថា ស្ត្រីពីរនាក់បានរងរបួស។ យោងតាមក្រសួងការពារជាតិ, “នៅពេលយន្តហោះល្បឿនលឿនជាងសំឡេង Sukhoi Su-34 របស់កងកម្លាំងអាកាស កំពុងហោះហើរលើទីក្រុង Belgorod មានគ្រាប់បែកបានធ្លាក់ដោយចៃដន្យ”។ ទោះបីជាយ៉ាងណាក៏ដោយ ក្រសួងប្រកាសថា ការស៊ើបអង្កេតកំពុងដំណើរការរួចទៅហើយ។

អភិបាលតំបន់ Belgorod លោក Vyacheslav Gladkov បាននិយាយនៅលើ Telegram ថា ក្រោយការផ្ទុះ មានរណ្ដៅទទឹង ២០ ម៉ែត្រលើផ្លូវដ៏ធំមួយ។ រថយន្ត៤គ្រឿង និងអគារអាផាតមិនចំនួន ៤បានរងការខូចខាត៕