រដ្ឋធានីរ៉ូម៖ អាជ្ញាធរអ៊ីតាលី បានចេញបញ្ជាឲ្យរឹបអូសនាវាកម្សាន្ដដ៏ទំនើប និង មានតម្លៃជិត១ពាន់លានដុល្លារ ដោយសារមានការជាប់ពាក់ព័ន្ធនឹងលោក វ៉្លាឌីមៀរ ពូទីន (Vladimir Putin) ប្រធានាធិបតីរុស្ស៊ី។ នេះបើយោងតាមការចុះផ្សាយដោយទីភ្នាក់ងារសារព័ត៌មាន BBC នៅថ្ងៃទី០៧ ឧសភា ២០២២។

នាវា Scheherazade បានទទួលនូវការជួសជុល នៅក្នុងកំពង់ផែ Tuscany ចាប់តាំងពីខែសីហា ឆ្នាំ២០២១ មកម៉្លេះ។ ប៉ុន្ដែក្រសួងហិរញ្ញវត្ថុអ៊ីតាលី បានបញ្ជាក់ថា ម្ចាស់នាវានេះ មានទំនាក់ទំនងយ៉ាងសំខាន់ ជាមួយនឹងរដ្ឋាភិបាលរុស្ស៊ី។

អ៊ីតាលី នឹងរឹបអូសនាវាដ៏ទំនើប មានតម្លៃ ៧០០លានដុល្លារនេះ ក្រោមទណ្ឌកម្មរបស់សហភាពអឺរ៉ុប ប្រឆាំងនឹងរុស្ស៊ី ជុំវិញការឈ្លានពានរបស់រុស្ស៊ី នៅក្នុងប្រទេសអ៊ុយក្រែន ចាប់តាំងពីថ្ងៃទី២៤ ខែកុម្ភៈ ឆ្នាំ២០២២មក។ ថ្វីបើម្ចាស់ពិតប្រាកដ នៃនាវា Scheherazade នេះ មិនត្រូវបានចុះផ្សាយយ៉ាងណាក្ដី ប៉ុន្តែមន្ត្រីសហរដ្ឋអាមេរិក បានប្រាប់កាសែត New York Times ថានាវាកម្សាន្ដដ៏ទំនើបនេះ អាចជាកម្មសិទ្ធិរបស់ប្រធានាធិបតីរុស្ស៊ី លោក ពូទីន។

គួរបញ្ជាក់ផងដែរថា នាវាកម្សាន្ដដ៏ទំនើបនោះ អាចចុះចតឧទ្ធម្ភាគចក្រ ចំនួន២គ្រឿង និង មានអាងហែលទឹកមួយ នៅខាងក្នុង ហើយវាជាកម្មសិទ្ធិរបស់លោក Eduard Khudainatov អតីតប្រធានក្រុមហ៊ុនថាមពលយក្សរុស្ស៊ី Rosneft ដែលបច្ចុប្បន្នមិនមែនជាគោលដៅ នៃទណ្ឌកម្មរបស់សហភាពអឺរ៉ុបនោះឡើយ៕RT