អន្តរជាតិ៖ អ្នកនាំពាក្យយោធាអ៊ីស្រាអែល លោក Jonathan Conricus បាននិយាយនៅក្នុងសន្និសីទខ្លីមួយថា ជនស៊ីវិលជាង 800,000 នាក់បានចាកចេញពីតំបន់ភាគខាងជើងនៃ Gaza Strip ។ នេះបើយោងតាមការចុះផ្សាយដោយទីភ្នាក់ងារសារព័ត៌មាន Tass នៅថ្ងៃទី ៣១ តុលា ២០២៣។

លោកបានកត់សម្គាល់ថា«យើងសប្បាយចិត្តដែលបានឃើញមនុស្សជាង ៨០ ម៉ឺននាក់បានជម្លៀសចេញពីផ្នែកខាងជើងពីតំបន់ប្រយុទ្ធសំខាន់»។

លោក Conricus បាននិយាយថា ជំនួយមនុស្សធម៌នៅតែបន្តបញ្ជូនទៅ Gaza តាមរយៈច្រកព្រំដែន Rafah មានអាហារ និងទឹកនៅភាគខាងត្បូងនៃតំបន់នោះ។ លោកបានបន្ថែមថា «នៅពេលប៉ុន្មានថ្ងៃកន្លងទៅ ខ្ញុំគិតថាយើងនឹងបង្កើនការសម្របសម្រួលរបស់យើងក្នុងការផ្តល់ជំនួយមនុស្សធម៌ដល់តំបន់ Gaza Strip»។

នៅថ្ងៃទី ១៣ ខែតុលា អ៊ីស្រាអែលបានជូនដំណឹងដល់អង្គការសហប្រជាជាតិថា ប្រជាជនប៉ាឡេស្ទីនចំនួន 1.1 លាននាក់គួរតែផ្លាស់ប្តូរទីតាំងទៅកាន់ភាគខាងត្បូងនៃ Gaza Strip ក្នុងរយៈពេល 24 ម៉ោង។ កងទ័ពអ៊ីស្រាអែលបាននិយាយថា ពួកសកម្មប្រយុទ្ធហាម៉ាសកំពុងលាក់ខ្លួនក្នុងផ្លូវរូងក្រោមដីក្រោមអគារជនស៊ីវិលនៅហ្គាហ្សា។ 

ទោះជាយ៉ាងណាក៏ដោយ ក្រុមហាម៉ាសបានជំរុញឱ្យប្រជាជននៅតំបន់ហ្គាហ្សាមិនអើពើនឹងការទាមទាររបស់អ៊ីស្រាអែល ហើយបានស្នើឱ្យអង្គការសហប្រជាជាតិចាត់វិធានការដើម្បីការពារប្រជាជនពីការបង្ខំឱ្យចេញពីផ្ទះរបស់ពួកគេ។

ភាពតានតឹងនៅមជ្ឈិមបូព៌ាបានផ្ទុះឡើងម្តងទៀតបន្ទាប់ពីក្រុមសកម្មប្រយុទ្ធហាម៉ាសបានជ្រៀតចូលអ៊ីស្រាអែលពីតំបន់ហ្គាហ្សាស្ទ្រីបកាលពីថ្ងៃទី 7 ខែតុលា។ ចលនាប៉ាឡេស្ទីនបានពណ៌នាអំពីការវាយប្រហាររបស់ខ្លួនថាជាការឆ្លើយតបទៅនឹងសកម្មភាពរបស់អាជ្ញាធរអ៊ីស្រាអែលប្រឆាំងនឹងវិហារអ៊ីស្លាម Al-Aqsa នៅលើប្រាសាទភ្នំ Jerusalem ។ 

គួរបញ្ជាក់ផងដែរថា អ៊ីស្រាអែលបានប្រកាសបិទហ្គាហ្សាទាំងស្រុង ហើយចាប់ផ្តើមធ្វើការវាយប្រហារលើតំបន់ប៉ាឡេស្ទីន ព្រមទាំងលើតំបន់មួយចំនួនក្នុងប្រទេសលីបង់ និងស៊ីរី។ ការប៉ះទង្គិចគ្នាក៏កំពុងកើតឡើងនៅតំបន់ West Bank៕RT