អន្តរជាតិ៖ សហរដ្ឋអាមេរិកនិងសម្ព័ន្ធមិត្តកំពុងប្រញាប់ប្រញាល់ជម្លៀសប្រជាជនជាច្រើនចេញពីអាហ្វហ្គានីស្ថានតាមដែលអាចធ្វើទៅបានមុនថ្ងៃផុតកំណត់ថ្ងៃទី ៣១ ខែសីហា ចំពេលមានការភ័យខ្លាចសន្តិសុខកើនឡើងនៅព្រលានយន្តហោះក្រុងកាប៊ុល។

សេតវិមានបានអោយដឹងនៅថ្ងៃព្រហស្បតិ៍ថា សហរដ្ឋអាមេរិកនិងដៃគូចម្រុះបានជម្លៀសប្រជាជនប្រហែល ១០០.១០០ នាក់ ចាប់តាំងពីថ្ងៃទី ១៤ ខែសីហា មួយថ្ងៃមុនពេលក្រុមតាលីបង់ចូលទីក្រុងកាប៊ុល។

នេះគឺជាព័ត៌មានលម្អិតបន្ថែមអំពីកិច្ចខិតខំប្រឹងប្រែងជម្លៀសតាមប្រទេស៖

អាមេរិក៖ ពលរដ្ឋអាមេរិកចំនួន ៤.៥០០ នាក់ និងក្រុមគ្រួសារ ដោយនៅមានពលរដ្ឋអាមេរិកប្រហែល ១.៥០០ នាក់ នៅក្នុងប្រទេសអាហ្វហ្គានីស្ថាន។

អង់គ្លេស៖ មនុស្សចំនួន ១៣.១៤៦ នាក់ និង ប្រហែល ៤០០ នាក់ ដែលត្រូវការជម្លៀសខ្លួននៅតែស្ថិតនៅក្នុងប្រទេសនៅឡើយ។

អាល្លឺម៉ង់៖ ប្រជាជនចំនួន ៥.១៩៣ នាក់ ហើយពលរដ្ឋអាល្លឺម៉ង់ជាង ២០០ នាក់ នៅតែស្ថិតនៅក្នុងទីក្រុងកាប៊ុល។ ជនជាតិអាឡឺម៉ង់ប្រមាណ ៥៤០ នាក់ ត្រូវបានជម្លៀសរួចហើយ។

បារាំង៖ ជនជាតិបារាំងជាង ១០០ នាក់ និងជនជាតិអាហ្វហ្គានីស្ថានជាង ២.០០០ នាក់ បានទៅដល់ដីបារាំង។

កាតា៖ ប្រជាជនជាង ៤០.០០០ នាក់ បានជម្លៀសទៅទីក្រុង Doha ហើយកិច្ចខិតខំប្រឹងប្រែងជម្លៀសនឹងបន្តនៅប៉ុន្មានថ្ងៃខាងមុខនេះ ក្នុងការពិគ្រោះយោបល់ជាមួយដៃគូអន្តរជាតិ ។

បែលហ្ស៊ិក៖ មនុស្សជាង ១.៤០០ នាក់ បានទៅដល់ទីក្រុងអ៊ីស្លាម៉ាបាដ កាលពីយប់ថ្ងៃពុធ។

កាណាដា៖ ប្រជាជនកាណាដានិងជនជាតិអាហ្វហ្គានីស្ថាន ប្រហែល ៣.៧០០ នាក់។

តួកគី៖ មនុស្សយ៉ាងតិច ១.៤០០ នាក់ ចេញពីអាហ្វហ្គានីស្ថាន ក្នុងនោះមានពលរដ្ឋតួកគីប្រហែល ១.០០០ នាក់។

ប៉ូឡូញ៖ មនុស្សប្រហែល ៩០០ នាក់ ក្នុងនោះមានស្ត្រីប្រហែល ៣០០ នាក់ និងកុមារ ៣០០ នាក់។

ឥណ្ឌា៖ មនុស្ស ៥៦៥ នាក់ ដែលភាគច្រើនជាបុគ្គលិកស្ថានទូតឥណ្ឌា និងពលរដ្ឋដែលរស់នៅទីនោះ។

សហព័ន្ធអារ៉ាប់រួម៖ ប្រជាជនចំនួន ៣៦.៥០០ នាក់ មកទល់ពេលនេះ រួមទាំង ៨.៥០០ នាក់ដែលមកដល់អារ៉ាប់រួមតាមរយៈក្រុមហ៊ុនអាកាសចរណ៍ជាតិឬព្រលានយន្តហោះរបស់ខ្លួន។

ហុងគ្រី៖ មនុស្សចំនួន ៥៤០ នាក់ រួមទាំងពលរដ្ឋហុងគ្រីនិងជនជាតិអាហ្វហ្កាននិងក្រុមគ្រួសាររបស់ពួកគេ។

ដាណឺម៉ាក៖ មនុស្សប្រហែល ១.០០០ នាក់ រួមមានបុគ្គលិកការទូត និងគ្រួសាររបស់ពួកគេ ក៏ដូចជាអតីតអ្នកបកប្រែ។

អូទ្រីស៖ មនុស្សចំនួន ៨៩ នាក់ ដែលមានសញ្ជាតិអូទ្រីស ឬនិវាសនជនត្រូវបានគេដឹកតាមយន្តហោះ ខណៈដែលមនុស្ស ២ ទៅ ៣ នាក់ផ្សេងទៀតកំពុងស្ថិតនៅក្នុងប្រទេសអាហ្វហ្គានីស្ថាន។

ស្វីស៖ មនុស្សចំនួន ២៩២ នាក់។

ហូឡង់៖ មនុស្ស ២.៥០០ នាក់ ដោយប្រហែល ១.៦០០ នាក់ ក្នុងចំណោមពួកគេត្រូវបាននាំទៅប្រទេសហូឡង់។

អូស្រ្តាលី៖ ប្រជាជនចំនួន ៤.១០០ នាក់ ក្នុងនោះមានពលរដ្ឋជាង ៣.២០០ នាក់ និងជនជាតិអាហ្វហ្គានីស្ថានដែលមានទិដ្ឋាការអូស្ត្រាលី។

នូវែលសេឡង់៖ ជនជាតិនូវែលសេឡង់ ២៧៦ នាក់ និងអ្នករស់នៅអចិន្ត្រៃយ៍ គ្រួសាររបស់ពួកគេ និងអ្នកកាន់ទិដ្ឋាការ។ NR