កៀវ៖ ផ្នែកសេវាសារព័ត៌មានប្រធានាធិបតីអ៊ុយក្រែនរាយការណ៍ថា លោក វ៉ូឡូឌីមៀ ហ្សេលេនស្គី បានបង្ហាញបញ្ជីអាទិភាពចំនួន ៦ ក្នុងអំឡុងធ្វើកិច្ចចរចាសន្តិភាពជាមួយភាគីរុស្ស៊ី។ នេះបើយោងការចុះផ្សាយដោយទីភ្នាក់ងារសារព័ត៌មាន ស៊ីនហួរ នៅថ្ងៃទី១៨ មីនា ២០២២។

លោក ហ្សេលេនស្គី បានថ្លែងនៅក្នុងសុន្ទរកថា ទៅកាន់ប្រជាជាតិអ៊ុយក្រែនកាលពីថ្ងៃព្រហស្បតិ៍ថា អាទិភាពរបស់ខ្ញុំក្នុងការចរចា គឺច្បាស់ណាស់ ក្នុងនោះរួមមានការបញ្ចប់សង្គ្រាម ការធានាសន្តិសុខ អធិបតេយ្យភាព ការស្ដារឡើងវិញនូវបូរណភាពទឹកដី ការធានាពិតប្រាកដ និង ការការពារពិតប្រាកដសម្រាប់ប្រទេសរបស់យើង។

លោក ហ្សេលេនស្គី បន្ថែមថា ការចរចារវាងអ៊ុយក្រែន និងរុស្ស៊ីកំពុងបន្ត។ គណៈប្រតិភូអ៊ុយក្រែន និងរុស្ស៊ីបានចាប់ផ្តើមការចរចាជុំទី៤ របស់ពួកគេនៅថ្ងៃចន្ទដើមសប្តាហ៍នេះ តាមរយៈវីដេអូអនឡាញ ហើយកាលពីថ្ងៃពុធ ទីប្រឹក្សាប្រធានាធិបតីអ៊ុយក្រែនលោក មីខែលឡូ ប៉ូដូលីយ៉ាក បាននិយាយថា លោក ហ្សេលេនស្គី អាចនឹងជួបពិភាក្សាជាមួយប្រធានាធិបតីរុស្ស៊ីលោក វ្ល៉ាឌីមៀ ពូទីន នៅប៉ុន្មានថ្ងៃខាងមុខនេះ។

ដោយឡែក អ្នកនាំពាក្យវិមានក្រឹមឡាំងលោក ឌីមីទ្រី ផេស្គូវ ក៏បានអះអាងដែរថា ជំនួបរវាងលោក ពូទីន និងលោក ហ្សេលេនស្គី គឺអាចកើតឡើងបាន៕RT