អន្តរជាតិ៖ អគ្គលេខាធិការអង្គការសហប្រជាជាតិ លោក Antonio Guterres មានការព្រួយបារម្ភយ៉ាងខ្លាំង ចំពោះការកើនឡើងអំពើហិង្សានាពេលថ្មីៗនេះ នៅក្នុងប្រទេសស៊ីរីភាគពាយ័ព្យ ក្នុងនោះមានដូចជាការបាញ់ផ្លោង និងការវាយប្រហារតាមអាកាសជាដើម ដែលបានបណ្តាលឲ្យជនស៊ីវិលស្លាប់ និងរបួស ទាំងនៅក្នុង និងជុំវិញជំរុំជនភៀសខ្លួននៅក្នុងខេត្ត Idlib។ នេះបើយោងតាមការចុះផ្សាយដោយទីភ្នាក់ងារសារព័ត៌មាន ស៊ីនហួរ នៅថ្ងៃទី១០ វិចិ្ឆកា ២០២២។

លោកស្រី Stephanie Tremblay ដែលជាអ្នកនាំពាក្យរងរបស់អគ្គលេខាធិការអង្គការសហប្រជាជាតិ បាននិយាយថា លោក Guterres អំពាវនាវឱ្យភាគីពាក់ព័ន្ធទាំងអស់ អនុវត្តការអត់ធ្មត់ជាអតិបរមា និងជៀសវាងបង្កើនភាពតានតឹងដល់ស្ថានភាពនេះ។

លោកស្រី Tremblay បានប្រាប់សន្និសីទសារព័ត៌មានថា លោក Guterres បានអំពាវនាវឱ្យរក្សាភាពស្ងប់ស្ងាត់ និងបញ្ជាក់ឡើងវិញនូវតម្រូវការសម្រាប់បទឈប់បាញ់ទូទាំងប្រទេស ដូចដែលបានអំពាវនាវនៅក្នុងដំណោះស្រាយលេខ ២២៥៤ របស់ក្រុមប្រឹក្សាសន្តិសុខ។

បើតាមលោកស្រី Tremblay យ៉ាងហោចណាស់ជនស៊ីវិល ១២១នាក់ត្រូវបានសម្លាប់ និង ២១០នាក់ផ្សេងទៀតបានរងរបួសនៅក្នុងប្រទេសស៊ីរីភាគពាយ័ព្យក្នុងឆ្នាំ២០២២នេះ។ លក្ខខណ្ឌមនុស្សធម៌បន្តធ្លាក់ចុះ ដោយសារតែអរិភាពដែលកំពុងបន្ត និងវិបត្តិសេដ្ឋកិច្ចកាន់តែស៊ីជម្រៅ។ 

គួរបញ្ជាក់ថា មនុស្សប្រហែល ៤.១លាននាក់ ដែល ៨០ភាគរយនៃពួកគេ ជាស្ត្រី និងកុមារ ដែលពឹងផ្អែកលើជំនួយរបស់អង្គការសហប្រជាជាតិ ដើម្បីបំពេញតម្រូវការចាំបាច់បំផុតរបស់ពួកគេ៕