ក្លាសហ្គូវ៖ អតីតប្រធានាធិបតីអាមេរិកលោក បារ៉ាក់ អូបាម៉ា បានបង្ហាញទំនុកចិត្តនៅក្នុងកិច្ចពិភាក្សាស្តីពីអាកាសធាតុ COP26 របស់អង្គការសហប្រជាជាតិ ថា រដ្ឋបាលលោក បៃដិន នឹងទទួលបានកញ្ចប់ថវិកាអាកាសធាតុចំនួន ៥៥៥ពាន់លានដុល្លាររបស់ខ្លួនតាមរយៈសភា ហើយបានស្តីបន្ទោសគូប្រជែងរបស់សហរដ្ឋអាមេរិក គឺចិន និងរុស្ស៊ីចំពោះអ្វីដែលលោកហៅថា “កង្វះភាពបន្ទាន់ដ៏គ្រោះថ្នាក់” ដើម្បីឆ្លើយតបនឹងបញ្ហាប្រែប្រួលអាកាសសកល។ នេះបើយោងតាមការចុះផ្សាយដោយទីភ្នាក់ងារសារព័ត៌មាន CNA នៅថ្ងៃទី០៩ វិច្ឆិកា ២០២១។

លោក អូបាម៉ា បានរិះគន់ប្រធានាធិបតីចិនលោក ស៊ី ជីនពីង និងប្រធានាធិបតីរុស្ស៊ីលោក វ៉្លាឌីមៀ ពូទីន ចំពោះការមិនចូលរួមជាមួយមេដឹកនាំពិភពលោកផ្សេងទៀតនៅក្នុងកិច្ចប្រជុំស្តីពីអាកាសធាតុនៅក្នុងទីក្រុងក្លាសហ្គូវ ប្រទេសស្កុតលែន។ លោក អូបាម៉ា បាននិយាយដូច្នេះថា វាជាការធ្លាក់ទឹកចិត្តជាពិសេស ក្នុងការឃើញមេដឹកនាំនៃអ្នកបញ្ចេញមតិដ៏ធំបំផុតរបស់ពិភពលោកពីរ គឺចិន និងរុស្ស៊ីបានបដិសេធមិនចូលរួមដំណើរការនីតិវិធី ហើយផែនការជាតិរបស់ពួកគេឆ្លុះបញ្ចាំងពីអ្វីដែលហាក់ដូចជាកង្វះភាពបន្ទាន់ដ៏គ្រោះថ្នាក់។ 

ជាមួយគ្នានេះ លោក អូបាម៉ា បានអំពាវនាវឱ្យបណ្ដាប្រទេសអ្នកមាន ជួយបណ្ដាប្រទេសក្រីក្រក្នុងការប្រយុទ្ធប្រឆាំងនឹងការប្រែប្រួល អាកាសធាតុ ហើយបានឆ្លៀតរិះគន់ចិន និងរុស្ស៊ីផងដែរថាមិនបានធ្វើសកម្មភាពគ្រប់គ្រាន់ដើម្បីរឹតត្បិតការបញ្ចេញឧស្ម័នផ្ទះកញ្ចក់។

គួរបញ្ជាក់ថា អតីតប្រធានាធិបតីអាមេរិករូបនេះបានសង្កត់ធ្ងន់ថា កិច្ចខិតខំប្រឹងប្រែងក្នុងការទប់ស្កាត់ការឡើងកម្ដៅផែនដីឱ្យនៅក្រោម ១.៥អង្សាសេ អនុលោមតាមកិច្ចព្រមព្រៀងទីក្រុងប៉ារីស ឆ្នាំ២០១៥ មានភាពជឿនលឿនទៅមុខតិចតួចតែប៉ុណ្ណោះ ដោយលោកអះអាងថា ចិន និងរុស្ស៊ីមិនមានការប្ដេជ្ញាចិត្តគ្រប់គ្រាន់ ដើម្បីឱ្យកិច្ចប្រជុំកំពូលក្នុងទីក្រុងក្លាសហ្គូវ ទទួលបានជោគជ័យនោះឡើយ៕