ម៉ាដ្រីត៖ ក្រុមជំនួយជនចំណាកស្រុក ឈ្មោះ Walking Borders បាននិយាយកាលពីថ្ងៃអាទិត្យថា យ៉ាងហោចណាស់មនុស្ស ៣០០ នាក់ ដែលកំពុងធ្វើដំណើរលើទូកចំណាកស្រុកចំនួន ៣ គ្រឿង ពីប្រទេសសេណេហ្គាល់ ទៅកាន់កោះកាណារី (Canary) របស់ប្រទេសអេស្ប៉ាញ បានបាត់ខ្លួន។

លោកស្រី Helena Maleno នៃក្រុមជំនួយជនចំណាកស្រុក Walking Borders បានប្រាប់សារព័ត៌មានថា ទូកចំនួនពីរដែលទូកមួយមានផ្ទុកមនុស្សប្រហែល ៦៥ នាក់ និងមួយទៀតមានចន្លោះពី ៥០ ទៅ ៦០ នាក់ បានបាត់ខ្លួនអស់រយៈពេល ១៥ ថ្ងៃ មកហើយចាប់តាំងពីពួកគេបានចាកចេញពីសេណេហ្គាល់ដើម្បីព្យាយាមទៅដល់ប្រទេសអេស្ប៉ាញ។ ចំណែកឯទូកទីបីបានចាកចេញពីសេណេហ្គាល់នៅថ្ងៃទី ២៧ ខែមិថុនា ដោយមានមនុស្សប្រហែល ២០០ នាក់ នៅលើនោះ។

លោកស្រី Helena Maleno ក៏បាននិយាយទៀតថា ក្រុមគ្រួសាររបស់អ្នកដែលនៅលើទូកទាំងនោះ មិនបានឮដំណឹងពីពួកគេទេ ចាប់តាំងពីពួកគេបានចាកចេញទៅ។ លោកស្រីបន្ថែមថា "ក្រុមគ្រួសារមានការព្រួយបារម្ភយ៉ាងខ្លាំង។ មានមនុស្សប្រហែល ៣០០ នាក់ មកពីតំបន់ដូចគ្នានៃប្រទេសសេណេហ្គាល់។ ពួកគេបានចាកចេញដោយសារតែអស្ថិរភាពនៅក្នុងប្រទេសសេណេហ្គាល់" ។

ទូកទាំងបីបានចាកចេញពី Kafountine នៅភាគខាងត្បូងនៃប្រទេសសេណេហ្គាល់ ដែលមានចម្ងាយប្រហែល ១.៧០០ គីឡូម៉ែត្រ (១.០៥៧ ម៉ាយល៍) ពី Tenerife ដែលជាកោះមួយក្នុងចំណោមកោះ Canary ។

ប្រជុំកោះកាណារី នៅឆ្នេរសមុទ្រនៃអាហ្វ្រិកខាងលិច បានក្លាយជាគោលដៅចម្បងសម្រាប់ជនចំណាកស្រុកដែលព្យាយាមទៅដល់ប្រទេសអេស្ប៉ាញ ជាមួយនឹងចំនួនតិចជាងនេះក៏កំពុងស្វែងរកឆ្លងសមុទ្រមេឌីទែរ៉ាណេទៅកាន់ដីគោករបស់អេស្ប៉ាញផងដែរ។ រដូវក្តៅគឺជារយៈពេលដ៏មមាញឹកបំផុតសម្រាប់ការព្យាយាមឆ្លងកាត់ទាំងអស់។

គួរបញ្ជាក់ថា ផ្លូវធ្វើចំណាកស្រុកអាត្លង់ទិក ដែលជាផ្លូវស្លាប់ច្រើនបំផុតនៅលើពិភពលោក ជាធម្មតាត្រូវបានប្រើប្រាស់ដោយជនចំណាកស្រុកមកពីអនុតំបន់សាហារ៉ាអាហ្វ្រិក។ យ៉ាងហោចណាស់មនុស្ស ៥៥៩ នាក់ រួមទាំងកុមារ ២២ នាក់ បានស្លាប់នៅឆ្នាំ ២០២២ ក្នុងការប៉ុនប៉ងទៅដល់កោះកាណារី នេះបើយោងតាមទិន្នន័យពីអង្គការអន្តរជាតិសម្រាប់ការធ្វើចំណាកស្រុករបស់អង្គការសហប្រជាជាតិ។ NR