ហ្សារកាតា៖ នាយកដ្ឋានឧតុនិយមបាននិយាយថា គ្រោះរញ្ជួយដីកម្រិត ៧,៤ រ៉ិចទ័រ បានវាយប្រហារភាគខាងកើតប្រទេសឥណ្ឌូណេស៊ី កាលពីថ្ងៃអង្គារ ដែលបង្កឱ្យមានការព្រមានអំពីរលកយក្សស៊ូណាមិ ប៉ុន្តែមិនមានការប្រកាសភ្លាមៗអំពីអ្នកស្លាប់ ឬការខូចខាតណាមួយឡើយ។

ការរញ្ជួយដីនេះបានកើតឡើងនៅម៉ោង 03:20 GMT នៅក្នុងសមុទ្រ Flores ចម្ងាយប្រហែល ១១២ គីឡូម៉ែត្រ (ប្រហែល ៧០ ម៉ាយល៍) ភាគពាយព្យនៃទីក្រុង Larantuka នៅផ្នែកខាងកើតនៃកោះ Flores ក្នុងជម្រៅ ១២ គីឡូម៉ែត្រ។

លោក Agustinus Florianus ជាអ្នកស្រុកនៃទីក្រុង Maumere នៅ Flores បានប្រាប់សារព័ត៌មានថា "មនុស្សគ្រប់គ្នាបានរត់ចេញទៅតាមផ្លូវ" ។ យ៉ាងណាម៉ិញ Maumere ធ្លាប់បានរងការខូចខាតយ៉ាងធ្ងន់ធ្ងររួចមកហើយដោយការរញ្ជួយដីដែលមានកម្រិតស្រដៀងគ្នានេះ ក្នុងឆ្នាំ ១៩៩២ ។

ការព្រមានអំពីរលកយក្សស៊ូណាមិ ត្រូវបានប្រកាសចេញសម្រាប់តំបន់ Maluku, East Nusa Tenggara, West Nusa Tenggara និងភាគអាគ្នេយ៍ និងខាងត្បូង Sulawesi។

ស្របពេលជាមួយគ្នានេះ ការស្ទាបស្ទង់ភូមិសាស្ត្រអាមេរិក ក្រោយមកបាននិយាយថា គ្រោះរញ្ជួយដីមានកម្រិត ៧,៣ រ៉ិចទ័រ។ ជាក់ស្តែង ទីភ្នាក់ងារឥណ្ឌូណេស៊ីបាននិយាយថា ការរញ្ជួយដីកម្រិត ៥,៦ រ៉ិចទ័រ បានវាយប្រហារទីក្រុង Larantuka បន្ទាប់ពីរញ្ជួយដីលើកដំបូង។

លោក Alfons Hada Betan ប្រធានទីភ្នាក់ងារកាត់បន្ថយគ្រោះមហន្តរាយ East Flores ក្នុងទីក្រុង Larantuka បាននិយាយថា មិនមានរបាយការណ៍ភ្លាមៗអំពីការខូចខាតទេ ហើយការរញ្ជួយដីនេះត្រូវបានគេដឹងអស់រយៈពេលជាច្រើននាទី ខណៈដែលមនុស្សបានភៀសខ្លួនចេញពីផ្ទះរបស់ពួកគេ។

ប្រជាជនបាននិយាយនៅលើប្រព័ន្ធផ្សព្វផ្សាយសង្គមថា ការរញ្ជួយដីក៏ត្រូវបានគេមានអារម្មណ៍យ៉ាងខ្លាំងនៅក្នុងទីក្រុង Makassar ភាគខាងត្បូង Sulawesi ផងដែរ។

មជ្ឈមណ្ឌលព្រមានរលកយក្សស៊ូណាមិនៅប៉ាស៊ីហ្វិក ដែលមានមូលដ្ឋាននៅសហរដ្ឋអាមេរិក បាននិយាយថា ដោយផ្អែកលើប៉ារ៉ាម៉ែត្ររញ្ជួយដីបឋម រលកយក្សស៊ូណាមិដែលមានគ្រោះថ្នាក់អាចកើតមានសម្រាប់ឆ្នេរសមុទ្រដែលមានចម្ងាយ ១.០០០ គីឡូម៉ែត្រ (ប្រហែល ៦២១,៣៧ ម៉ាយល៍) នៃចំណុចកណ្តាលនៃការរញ្ជួយដី។

គួរបញ្ជាក់ថា លោក Muhamad Sadly មន្ត្រីម្នាក់ជាមួយទីភ្នាក់ងារឧតុនិយមបានប្រាប់ទូរទស្សន៍ Metro TV ប្រជាជនគួរតែនៅឱ្យឆ្ងាយពីឆ្នេរសមុទ្រដោយបន្ថែមថា ការព្រមានអំពីរលកយក្សស៊ូណាមិនឹងត្រូវបានដកចេញយ៉ាងហោចណាស់ ២ម៉ោង បន្ទាប់ពីវាត្រូវបានចេញផ្សាយ។ NR