បាងកក៖ អាជ្ញាធរថៃកំពុងបង្កើនការរឹតត្បិតលើការធ្វើដំណើរ និងវិធានការផ្សេងទៀត ដើម្បីប្រយុទ្ធប្រឆាំងនឹងការឆ្លងរាលដាលនៃជំងឺកូវីដ១៩ ដែលកើតមានយ៉ាងឆាប់រហ័សនៅពេលដែលប្រទេសនេះមានមនុស្សស្លាប់ ១១ នាក់ កាលពីថ្ងៃអាទិត្យដែលជាកំណត់ត្រាប្រចាំថ្ងៃ។

ទោះបីជាប្រទេសថៃទទួលបានជោគជ័យក្នុងការទប់ស្កាត់ការរីករាលដាលនៃមេរោគកាលពីឆ្នាំមុនក៏ដោយ ក៏ការផ្ទុះឡើងថ្មីមួយដែលកើតឡើងដោយសារវីរុសប្រភេទ B.1.1.7 ដែលអាចចម្លងទៅមនុស្សនៅក្នុងអត្រាខ្ពស់ បានបណ្តាលឱ្យមានករណីជាង ២៤.០០០ ករណីនិងមានអ្នកស្លាប់ចំនួន ៤៦ នាក់ក្នុងរយៈពេលត្រឹមតែ ២៥ ថ្ងៃ ប៉ុណ្ណោះ។

យ៉ាងណាម៉ិញ ប្រទេសថៃបានរាយការណ៍ មានករណីឆ្លងថ្មីនៃកូរូណាវីរុសចំនួន ២.៤៣៨ នាក់ និងមានអ្នកស្លាប់ថ្មីចំនួន ១១ នាក់កាលពីថ្ងៃអាទិត្យ ដែលជាថ្ងៃទី ២ ជាប់ៗគ្នានៃការស្លាប់។

ជាងនេះទៅទៀត វិធានការណ៍ផ្សេងទៀតដែលបានប្រកាសនៅចុងសប្តាហ៍នេះ រួមមានការបិទកន្លែងនានានៅទីក្រុងបាងកក ដូចជាសួនឧទ្យាន កាយសម្ព័ន្ធកីឡា រោងកុន និងមណ្ឌលថែទាំពេលថ្ងៃ ចាប់ពីថ្ងៃទី ២៦ ខែមេសា ដល់ថ្ងៃទី ៩ ខែឧសភា។ ទីក្រុងបាងកក ក៏បានណែនាំការផាកពិន័យរហូតដល់ ២០.០០០ បាត (៦៣៥ ដុល្លារ) សម្រាប់មនុស្សដែលមិនបានពាក់របាំងមុខនៅទីសាធារណៈ។