ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ដ្រី នៃកម្ពុជា បានស្នើបណ្តាខេត្ត ដែលមានបងប្អូនឥស្លាមរស់នៅច្រើន យ៉ាងហោចណាស់ ក៏ត្រូវឱ្យបងប្អូនឥស្លាមដែលមានសមត្ថភាព អាចឡើងធ្វើជាអភិបាលរងខេត្ត ឬបើមានសមត្ថភាពធ្វើអភិបាលខេត្តតែម្តង។

សម្ដេចតេជោ ហ៊ុន សែន ស្នើបែបនេះ ក្នុងឱកាសអញ្ជើញជាអធិបតីបិទសន្និបាតត្រួតពិនិត្យលទ្ធផលការងារប្រចាំឆ្នាំ២០២១ និងលើកទិសដៅការងារឆ្នាំ២០២២ របស់ក្រសួងមហាផ្ទៃ នៅរសៀលថ្ងៃទី២៣ ខែកុម្ភៈ ឆ្នាំ២០២២ ។

សម្តេចតេជោ ហ៊ុន សែន បានបញ្ជាក់ថា នេះមិនមែនជាកូតាទេ ប៉ុន្តែជាការសម្រួលដល់ខេត្តដែលមានបងប្អូនពលរដ្ឋខ្មែរឥស្លាមច្រើន។ សម្តេចតេជោ បានចាត់ទុកថា នេះ មិនមែនជាកូតាទេ ជាការសម្រួលដើម្បីសុខដុមរមនានៅក្នុងខេត្ត ហើយជាក្របខណ្ឌគោលនយោបាយ។

សម្តេចតេជោ ក៏បានអំពាវនាវឱ្យនិស្សិតឥស្លាម ត្រូវខិតខំកសាងសមត្ថភាព ដើម្បីមានឱកាសទទួលបានតំណែងជាអភិបាលរង ឬអភិបាលខេត្ត ឬស្រុក។

សម្តេចតេជោ ក៏បានណែនាំឱ្យថ្នាក់ខេត្ត ត្រូវរៀបចំពិនិត្យមើលតើស្រុកណាដែលមានឥស្លាមច្រើន។ សម្តេចតេជោ ហ៊ុន សែន បានបញ្ជាក់ទៀតថា ប្រសិនបើមានមន្រ្តីជាន់ខ្ពស់ជាឥស្លាម នោះគឺ ងាយស្រួលដើម្បីប្រសិទ្ធភាពការងារទំនាក់ទំនងរវាងអាជ្ញាធរ និងពលរដ្ឋ។

ជាមួយគ្នានេះ សម្តេចតេជោ ហ៊ុន សែន ក៏បានលើកឡើងពាក់ព័ន្ធនឹងបងប្អូនជនជាតិភាគតិចផងដែរ ក៏អាចមានតួនាទីជាអភិបាលរង ឬអភិបាលខេត្តបានផងដែរ សម្រាប់ខេត្តនៅភាគឥសានកម្ពុជា។ សម្តេចតេជោ ក៏បានបញ្ជាក់ដែរថា «កំណែទម្រង់នេះ ក៏ត្រូវអាស្រ័យលើលក្ខណៈសម្បត្តិផងដែរ មុននឹងតែងតាំង»៕EB