ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា បានសង្កេតឃើញថា ប្រជាពលរដ្ឋខ្មែរ សប្បាយរីករាយ និងសាមគ្គីភាពគ្នា នៅពេលបុណ្យចូលឆ្នាំថ្មីនាពេលនេះ ដូចៗគ្នា គ្មានសញ្ញារើសអើង ឬបែងចែកគណបក្សនយោបាយណាមួយឡើយ។ 

ក្នុងពិធីអភិសេករូបសំណាក «ព្រះថោងនាងនាគ» ក្នុងខេត្តព្រះសីហនុ នាព្រឹកថ្ងៃទី១៦ ខែមេសា ឆ្នាំ២០២២ សម្ដេចតេជោ ហ៊ុន សែន បានថ្លែងថា ពិធីបុណ្យចូលឆ្នាំថ្មីនាពេលនេះ ប្រជាពលរដ្ឋខ្មែរបានសប្បាយរីករាយយ៉ាងខ្លាំង ខណៈប្រជាពលរដ្ឋមួយចំនួន ក៏បានចេញដើរកម្សាន្ដទូទាំងប្រទេស ក្រោយពី ពិធីបុណ្យចូលឆ្នាំត្រូវអខានរយៈពេល ២ឆ្នាំកន្លងទៅ ដោយសារបញ្ហាជំងឺកូវីដ-១៩។

សម្ដចតេជោ បន្ដថា ដោយសារកម្ពុជា បានគ្រប់គ្រងជំងឺកូវីដ-១៩ យ៉ាងល្អ ជាមួយនឹងសន្ដិភាព ធ្វើឲ្យប្រជាពលរដ្ឋដើរលេងគ្រប់ទីកន្លែងទាំងអស់។ សម្ដេច ថា បន្ទាប់ពីនេះទៅ មានអ្វីកើតឡើងទៀត? ខណៈ សម្ដេច ជឿជាក់ទៅលើប្រជាពលរដ្ឋខ្មែរ ខណៈអ្នកឆ្លងជំងឺកូវីដ-១៩ កាលពីថ្ងៃទី១៥ មេសា មានតែ ១២នាក់ប៉ុណ្ណោះ។

សម្ដេចតេជោ មានប្រសាសន៍ថា «ខ្ញុំ ពិតជាឃើញថា មានការសប្បាយរីករាយ ហើយមានសាមគ្គីភាពនៅក្នុងចំណោមប្រជាជនទាំងអស់របស់យើង នៅតាមភូមិ តាមឃុំ និងទីកន្លែងកម្សាន្ដនានា បើទោះបីប្រទេសជាតិរបស់យើងមាន ១៧គណបក្ស ដែលត្រៀមប្រកួតប្រជែង នៅពេលខាងមុខនេះក៏ដោយចុះ ក៏ប៉ុន្ដែយើងមិនបានឃើញសញ្ញានៃការបែងចែក រើសអើងណាមួយ នៅក្នុងចំណោះប្រជាជនរបស់យើង នៅពេលវេលាដែលសម្រាប់មកដល់ការបោះឆ្នោតនោះទេ។ គេចូលរាំង គេសប្បាយរីករាយ ចូលលេងជាមួយគ្នា ដោយមិនគិតថា អ្នកណា នៅខាងគណបក្សណានោះទេ»។

លើសពីនេះ សម្ដេចតេជោ នាយករដ្ឋមន្ដ្រី បានលើកឡើងថា ការទទួលបានវ៉ាក់សាំងកូវីដ-១៩ ក៏ដូចៗគ្នាដែរ កម្ពុជា គ្មានការជ្រើសរើសចំពោះប្រជាពលរដ្ឋរបស់ខ្លួន ទោះបីនៅគណបក្សនយោបាយណាក៏ដោយ សុទ្ធតែទទួលបានវ៉ាក់សាំងដូចៗគ្នាទាំងអស់៕EB