ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានគិតថា នាពេលខាងមុខ អ្នកមិនចាក់វ៉ាក់សាំងបង្ការជំ ងឺកូវីដ-១៩ មិនអាចបានទទួលឲ្យចូលប្រឡង ឬជ្រើសរើស ឲ្យចូលធ្វើការងារឡើយ។

តាមរយៈសារសំឡេង នៅយប់ថ្ងៃទី៦ ខែមេសា ឆ្នាំ២០២១ សម្ដេចតេជោ ហ៊ុន សែន បានឲ្យដឹងថា ដំណើរការចាក់វ៉ា ក់សាំងបង្ការជំងឺកូវីដ-១៩ លើក្រុមអាទិភាពនៅទូទាំងប្រទេស បាននិងកំពុងដំណើរការ ប៉ុន្តែពិនិត្យស្ថានភាពនាពេលខាងមុខ ជំហានបន្តគឺត្រូវគ្រប់គ្រងការរីករាលដាលជំងឺកូវីដ នៅរាជធានីភ្នំពេញ និងខេត្តកណ្ដាល ឲ្យខានតែបាន។ 

សម្តេចតេជោ បន្ដថា ចាំបាច់ត្រូវតែមានភាពសាំនៅរាជធានីភ្នំពេញ និងខេត្តកណ្ដាល ដូច្នេះ ធ្វើផែនការរៀបចំសម្រាប់ ចាក់វ៉ាក់សាំងបន្ត នៅពេលវ៉ាក់សាំងថ្មីមកដល់ ត្រូវសំដៅឆ្ពោះទៅលើរាជធានីភ្នំពេញ និងខេត្តកណ្ដាល។ សម្ដេចថា នាពេលបច្ចុប្បន្ននៅកម្ពុជាដំណើរការចាក់វ៉ាក់សាំងដោយគោលការណ៍ស្ម័គ្រចិត្ត។ ប៉ុន្ដែ សម្ដេច គិតថានៅពេលណាមួយ គឺវ៉ាក់សាំងក្លាយទៅជាវ៉ាក់សាំងកាតព្វកិច្ច។

សម្ដេចតេជោ បញ្ជាក់យ៉ាងដូច្នេះថា «ខ្ញុំគិតថា សម្រាប់នៅប្រទេសកម្ពុជាយើង នៅទីក្រុងភ្នំពេញ នៅខេត្តកណ្ដាល និង នៅកន្លែងដទៃទៀត នៅពេលដែលរោងចក្រ សហគ្រាស និងក្រុមហ៊ុនបានចាក់វ៉ាក់សាំងអស់ហើយ អ្នកពុំមាន ពុំបានចាក់វ៉ាក់សាំងហ្នឹងអាចមិនទទួលបានការងារធ្វើនៅទីនោះទៀតទេ ហើយការប្រឡងចូលជ្រើសរើសបុគ្គលិក នៅពេល មិនបានទទួលវ៉ាក់សាំងហ្នឹងទេ គឺពួកគេក៏នឹងត្រូវមិនបានទទួលឲ្យប្រឡងចូល ឬជ្រើសរើសឲ្យចូលធ្វើការដែរ»។

សម្ដេចតេជោ បន្ដថា «បន្ដិចទៀតនៅលើពិភពលោកអាចថា វ៉ាក់សាំង ក្លាយទៅជាវ៉ាក់សាំងកាតព្វកិច្ចតែម្ដង នេះជាការប្រមើមើលរបស់ខ្ញុំ ដែលខ្ញុំគិតថា អ្នកដែលមិនបានចាក់វ៉ាក់សាំង គឺអ្នកដែលអភ័ព្វ អ្នកពុំមានលទ្ធភាពទទួលបានការងារធ្វើ ឬត្រូវបានស្វាគមន៍ពីសំណាក់អ្នកដែលទទួលបានវ៉ាក់សាំង ដែលបង្កើតទៅជាការរើសអើង»៕