មនុស្សណាក៏ចេះធ្វើខុសដែរ តែមិនមែនគ្រប់គ្នាសុទ្ធតែចេះទទួលស្គាល់ថាខ្លួនបានធ្វើខុសទាំងអស់នោះទេ។ មនុស្សចូលចិត្តយកឈ្នះអ្នកដទៃ ខ្លួនធ្វើខុសមិនដឹងខុសឡើយ និយាយយកតែឈ្នះ។ ជួនកាល ការដែលចង់តែយកឈ្នះនេះហើយទើបធ្វើឱ្យគេមិនចូលចិត្ត។ តើប្រិយមិត្តដឹងទេថា ការចេះទទួលស្គាល់កំហុសដែលខ្លួនបានធ្វើ
នោះ គឺជារឿងល្អ និងអាចជួយស្រោចស្រង់រាល់ទង្វើមិនគប្បីទាំងឡាយដែលអ្នកបានធ្វើទៅលើអ្នកដទៃ? តើមានប្រយោជន៍អ្វីខ្លះដែលលោកអ្នកនឹងទទួលបានពីការចេះទទួលកំហុសនេះ? ចំនុចទាំង៥ខាងក្រោមនេះ គឺជាអ្វីដែល ក្រុមការងារNP NEWS ដកស្រង់ចេញពីគំនិតអប់រំមួយចំនួនរបស់សហគ្រិនជោគជ័យដែលបានចែករំលែកបទពិសោធន៍ក្នុងបណ្តាញទំនាក់ទំនងសង្គម៖
១)ភាពជឿជាក់៖ ភាពជឿជាក់គឺជារឿងសំខាន់សម្រាប់មនុស្សគ្រប់គ្នាក្នុងការប្រាស្រ័យទាក់ទងគ្នា បើសិនជាអ្នកធ្វើខុសហើយ តែមិនដែលចេះទទួលស្គាល់ថាខ្លួនឯងធ្វើខុស នោះគ្មានអ្នកណាជឿជាក់លើអ្នកឡើយ។ ផ្ទុយទៅវិញ បើសិនជាអ្នកធ្វើខុស ហើយចេះទទួលស្គាល់កំហុស នោះគ្រប់គ្នានៅជុំវិញអ្នកគិតថាអ្នកជាមនុស្សស្មោះត្រង់អាច
ជឿទុកចិត្តបាន និងជាមិត្តដ៏ល្អម្នាក់ទៀតផង។
២)ធំដឹងក្តី៖ អ្នកនឹងក្លាយជាមនុស្សកាន់តែធំដឹងក្ដីស្គាល់ខុស ស្គាល់ត្រូវស្គាល់អ្វីល្អនិងអ្វីដែលអាក្រក់នៅពេលដែលអ្នកចេះទទួលស្គាល់កំហុសរបស់ខ្លួន។ កំហុសអាចក្លាយជាមេរៀនដ៏ល្អសម្រាប់ជីវិត។
៣)ការអភិវឌ្ឍ៖ បើសិនជាអ្នកមិនទាន់អាចទទួលស្គាល់កំហុសដែលបានធ្វើខុសទេ នោះអ្នកគឺជាមនុស្សដែលខ្លាចបរាជ័យបំផុត។ ដូច្នេះ ដើម្បីអភិវឌ្ឍខ្លួនឱ្យទាន់សម័យ និងជោគជ័យ នោះលោកអ្នកត្រូវចេះទទួលស្គាល់កំហុសដែលបានប្រព្រឹត្ត។
៤)ការលើកទឹកចិត្ត៖ បើសិនជាអ្នកមិនអាចទទួលស្គាល់ថាខ្លួនបានធ្វើខុសក្នុងរឿងអ្វីមួយទេ នោះអ្នកនឹងមិនមានឱកាសសម្រាប់និយាយប្រកាន់ជំហរថាខ្លួនត្រូវឡើយ។ ធម្មតា នៅពេលមានមនុស្សណាម្នាក់ធ្វើអ្វីខុសមួយហើយគេម្នាក់នោះចេះទទួលស្គាល់កំហុស នោះនឹងមានអ្នកដទៃមកចាំជួយផ្ដល់កម្លាំងចិត្ត និងលើកទឹកចិត្តដើម្បីជួយកែកំហុសទាំងអស់គ្នា។
៥)ភាពរឹងមាំ៖ បើសិនជាអ្នកក្លាយជាមនុស្សម្នាក់ដែលដឹងខុស ចេះទទួលកំហុស នោះអ្នកនឹងក្លាយជាមនុស្សម្នាក់ដែលរឹងមាំ និងឯករាជ្យសម្រាប់អ្នកដទៃ។ ហើយអ្នកក៏អាចក្លាយជាគំរូដ៏ល្អម្នាក់សម្រាប់ក្មេងៗជំនាន់ក្រោយយកគំរូតាម៕ដោយPP
