សូមរាយការណ៍ ករណីឃាតកម្ម ដែលបានផ្សព្វផ្សាយក្នុងបណ្តាញសង្គម អាវុធហត្ថរាជធានីភ្នំពេញ សូមអំពាវនាវដល់សាធារណៈជន ទាំងឡាយណា ដែលបានឃើញឬស្គាល់ឬមានដំណឹងរបស់ជនសង្ស័យ សូមរាយការណ៍ មកកាន់មន្ត្រីកងរាជអាវុធហត្ថរាជធានីភ្នំពេញ ដែលមានទូរស័ព្ទលេខ ៖

- 012 383 383

- 012 66 77 98

- 017 81 81 71

ដោយឡែកចំពោះបក្ខពួក ដែលបានចូលរួមធ្វើសកម្មភាពជាមួយជនដៃដល់ សូមចេញមុខសារភាពនោះនឹងទទួលបានការសម្រាលទោសពីច្បាប់។

សូមរំលឹកថា ករណីនេះបានកើតឡើងកាលពីម៉ោង ៧ និង ៤០នាទី យប់ថ្ងៃទី១១ ខែកុម្ភៈ ឆ្នាំ២០២១ ជម្លោះមួយ បានឈានដល់អំពើហិង្សារហូតដល់បាញ់សម្លាប់មនុស្សបានកើតឡើង នៅមុខហាងលក់ទូរស័ព្ទ ពន្លកថ្មី ក្នុងបុរីប៊ុនហួរ ស្ថិតក្នុងភូមិព្រៃព្រីងខាងត្បូង១ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ។

បណ្តាលឲ្យបុរស ២នាក់ បានស្លាប់ និងបុរសម្នាក់ទៀត រងរបួសធ្ងន់ កំពុងសង្គ្រោះបន្ទាន់ នៅមន្ទីរពេទ្យរុស្ស៊ី។ ជនរងគ្រោះ ដែលស្លាប់ មានឈ្មោះ សៀក លីម ភេទប្រុស អាយុ ២៥ឆ្នាំ (ស្លាប់) និងឈ្មោះ សុខ ស៊ីដេត ភេទប្រុស អាយុ៤០ឆ្នាំ (ស្លាប់)។ ចំណែកឈ្មោះ បូ រ៉ាភី ភេទប្រុស អាយុ ៤៦ឆ្នាំ របួសធ្ងន់កំពុងសង្គ្រោះបន្ទាន់ នៅមន្ទីរពេទ្យរុស្ស៉ី។ជម្លោះនោះ ដោយសារអ្នករត់ម៉ូតូកង់បី ស៊ីប្លេឲ្យបើកឡានចេញ ព្រោះទើសផ្លូវ តែម្ចាស់ឡានមិនព្រម ក៏កើតជាទំនាស់ពាក្យសម្តី។

ក្រោយមក អ្នករត់កង់បី បាននាំគ្នីគ្នាមករករឿងម្ចាស់ឡានដល់ផ្ទះ ហើយក៏ឈានដល់ការវាយតប់គ្នា និងចុងក្រោយ ក្រុមខាងម៉ូតូកង់បី មានកាំភ្លើងខ្លី ដកបាញ់សំដៅក្បាលបុរស ៣នាក់ បណ្តាលឲ្យដេកដួលនៅនឹងកន្លែង ហើយដឹកទៅដល់ពេទ្យ ស្លាប់២នាក់ និងម្នាក់ត្រូវសង្គ្រោះបន្ទាន់៕SP