(WHO)៖អង្គការសុខភាពពិភពលោក WHO បានធ្វើបច្ចុប្បន្នភាពលើដែនកំណត់នៃការកម្រិតធាតុពុលនៅក្នុងខ្យល់។ នេះជាលើកទី១ គិតតាំងពីឆ្នាំ ២០០៥ ដែលអង្គការសុខភាពពិភពលោកបានផ្តើមពិនិត្យមើលឡើងវិញលើការកំណត់កម្រិតធាតុពុលនៅក្នុងខ្យល់ដូចជាល្អងធូលីតូចល្អិតឆ្មារ អូហ្សូន អាសូតឌីអុកស៊ីត ស្ពាន់ធ័រឌីអុកស៊ីត និងកាបោនម៉ូណូអុកស៊ីត។
តាម WHO ធាតុពុលក្នុងខ្យល់ជាអ្នកទទួលខុសត្រូវនៃការស្លាប់មនុស្សមុនអាយុចំនួន ៧លាននាក់ក្នុងមួយឆ្នាំ។« មិនមានអ្វីសំខាន់ចំពោះជីវិតជាងខ្យល់ទេ។ ក៏ប៉ុន្តែ ដោយសារតែការបំពុលបរិយាកាស ការដកដង្ហើមចេញ ចូលយ៉ាងសាមញ្ញបានបណ្តាលឱ្យមនុស្សស្លាប់ចំនួន ៧ លាននាក់ក្នុងមួយឆ្នាំ » នេះជាការថ្លែងរបស់អគ្គនាយកអង្គការសុខភាពពិភពលោក WHO លោកទេដ្រូសនៅក្នុងសន្និសីទកាសែត។ លោកទេដ្រូសបានគូសបញ្ជាក់ថា ការបំពុលបរិយាកាសជាការគំរាមកំហែងដល់សុខភាពនៅក្នុងប្រទេសទាំងអស់ តែប្រទេសដែលរងផលប៉ះពាល់ខ្លាំងជាងគេ គឺប្រទេសដែលមានចំណូលទាប និងមធ្យម។ ចំណែកលោកហាន ហង់រី គ្លូ នាយក WHO ប្រចាំតំបន់អឺរ៉ុបបានបញ្ជាក់ថា ខ្យល់អាកាសបរិសុទ្ធគួរតែជាសិទ្ធិជាមូលដ្ឋានរបស់មនុស្សលោក និងជាលក្ខខណ្ឌចាំបាច់សម្រាប់សុខភាព និងផលិតភាពរបស់សង្គម។
ដោយឡែក លោកស្រីម៉ារីយ៉ា នេរ៉ា នាយិកានាយកដ្ឋានទទួលបន្ទុកបរិស្ថាន ការប្រែប្រួលអាកាសធាតុ និងសុខភាពនៅ WHO បានលើកឡើងពីចំណងទាក់ទងរវាងការប្រយុទ្ធប្រឆាំងនឹងការប្រែប្រួលអាកាសធាតុ និងការបំពុលខ្យល់ក្នុងបរិយាកាស។ WHO បានលើកឡើងពីផលវិបាកកើតចេញពីការស្រូបខ្យល់ពុលក្នុងបរិយាកាសចំពោះកូនក្មេង និងមនុស្សធំ។ ចំពោះកូនក្មេង គឺអាចធ្វើឲ្យរាំងស្ទះដល់ការលូតលាស់សួត បង្កឱ្យមានជំងឺរលាកផ្លូវដង្ហើម និងធ្វើឱ្យជំងឺហឺតមានស្ថានភាពកាន់តែធ្ងន់ធ្ងរ។ ចំពោះមនុស្សធំវិញ ខ្យល់ពុលក្នុងបរិយាកាសជាបុព្វហេតុនៃការស្លាប់មុនអាយុដោយជំងឺបេះដូង និងជំងឺដាច់សរសៃឈាមខួរក្បាល។
ដោយឡែក ទិន្នន័យថ្មីរបស់ WHO ក៏បានបញ្ជាក់ផងដែរថា ខ្យល់ពុលក្នុងបរិយាកាសក៏អាចជាដើមចមនៃជំងឺទឹកនោមផ្អែម និងជំងឺប្រព័ន្ធប្រសាទ។ អ្វីជាការកត់សម្គាល់ អង្គការសុខភាពពិភពលោកបានប្រដូចហានិភ័យចំពោះសុខភាពដែលកើតចេញពីការបំពុលខ្យល់ទៅនឹងកត្តាហានិភ័យសំខាន់ផ្សេងទៀត ដូចជារបបអាហារមិនល្អ និងការជក់បារី៕
