SEOUL៖ ទីភ្នាក់ងារព័ត៌មានផ្លូវការ KCNA បានរាយការណ៍ថា ប្រទេសកូរ៉េខាងជើង កាលពីថ្ងៃអង្គារ បានធ្វើការបរិហារលើយុទ្ធសាស្ត្រសន្តិសុខថ្មីរបស់ប្រទេសជប៉ុននៃ ការផ្លាស់ប្តូរមូលដ្ឋានបរិបទសន្តិសុខក្នុងតំបន់ ហើយបានព្រមានថាវានឹងបង្ហាញថាជម្រើសរបស់ជប៉ុន "មិនត្រឹមត្រូវ" និង "គ្រោះថ្នាក់" ជាមួយនឹងសកម្មភាពដែលមិនជាក់លាក់។

អ្នកនាំពាក្យក្រសួងការបរទេសកូរ៉េខាងជើងបានធ្វើការកត់សម្គាល់នៅក្នុងសេចក្តីថ្លែងការណ៍ដែលធ្វើឡើងដោយសារព័ត៌មាន KCNA ប៉ុន្មានថ្ងៃបន្ទាប់ពីប្រទេសជប៉ុនបានបង្ហាញពីការកសាងយោធាដ៏ធំបំផុតរបស់ខ្លួនចាប់តាំងពីសង្គ្រាមលោកលើកទី ២ មក ខណៈដែលភាពតានតឹងក្នុងតំបន់ និងការឈ្លានពានអ៊ុយក្រែនដោយប្រទេសរុស្ស៊ី បានបង្កឱ្យមានការភ័យខ្លាចនឹងសង្គ្រាម។

មន្ត្រីរូបនេះបាននិយាយនៅក្នុងសេចក្តីថ្លែងការណ៍ថា "ប្រទេសជប៉ុនកំពុងនាំមកនូវវិបត្តិសន្តិសុខដ៏ធ្ងន់ធ្ងរមួយនៅឧបទ្វីបកូរ៉េ និងនៅក្នុងតំបន់អាស៊ីបូព៌ា ដោយប្រកាន់យកនូវយុទ្ធសាស្ត្រសន្តិសុខថ្មីមួយ ដែលប្រឆាំងនឹងប្រទេសដទៃទៀត"។ ជាងនេះទៅទៀតមន្ត្រីរូបនេះបានបន្ថែមថា បរិយាកាសសន្តិសុខនៅក្នុងតំបន់បាន "ផ្លាស់ប្តូរជាមូលដ្ឋាន" ដោយសារតែគោលនយោបាយថ្មីរបស់ប្រទេសជប៉ុន ហើយបានបរិហារទង្វើនេះថា ជាការរំលោភលើធម្មនុញ្ញអង្គការសហប្រជាជាតិ និងជា "ការប្រឈមដ៏ធ្ងន់ធ្ងរ" ចំពោះសន្តិភាពអន្តរជាតិ។

មន្ត្រីរូបនេះក៏បានសង្កត់ធ្ងន់ទៀតថា "យើងបញ្ជាក់ឱ្យច្បាស់ម្តងទៀតថា យើងមានសិទ្ធិចាត់វិធានការយោធាយ៉ាងម៉ឺងម៉ាត់ និងតឹងរ៉ឹង ដើម្បីការពារសិទ្ធិជាមូលដ្ឋានរបស់យើង... ដើម្បីឆ្លើយតបទៅនឹងបរិយាកាសសន្តិសុខក្នុងតំបន់ដ៏ស្មុគស្មាញ"។ "ជប៉ុននឹងរៀនក្នុងពេលឆាប់ៗនេះ ជាមួយនឹងភាពតក់ស្លុត ដែលបានជ្រើសរើសជម្រើសខុស និងគ្រោះថ្នាក់ខ្លាំងបំផុត"។

គួរជម្រាបថា ផែនការរយៈពេល ៥ឆ្នាំ របស់ទីក្រុងតូក្យូ ដែលមិននឹកស្មានដល់ក្នុងវិស័យសន្តិភាពជប៉ុន នឹងធ្វើឱ្យប្រទេសនេះក្លាយជាប្រទេសដែលចំណាយយោធាច្រើនជាងគេលំដាប់ទី ៣ របស់ពិភពលោក បន្ទាប់ពីសហរដ្ឋអាមេរិក និងចិន ដោយផ្អែកលើថវិកាបច្ចុប្បន្ន។ NR