រុស្ស៊ី៖ យោធាអ៊ុយក្រែនបានឲ្យដឹង នៅក្នុងការអាប់ដេតនៅថ្ងៃចន្ទនេះថា កងកម្លាំងរុស្ស៊ី ក្នុងប្រទេសអ៊ុយក្រែន បានបាត់បង់សម្ភារៈយោធាយ៉ាងច្រើន ក្នុងរយៈពេល ២៤ម៉ោង ខណៈដែលទីក្រុងម៉ូស្គូបង្កើនការពង្រឹង ដើម្បីត្រៀមសម្រាប់ការវាយលុក របស់អ៊ុយក្រែនដែលអាចកើតមាន។នេះបើតាមការចេញផ្សាយដោយសារព័ត៌មានAljazeeraនៅថ្ងៃទី ១០ ខែមករា ឆ្នាំ២០២៣។

កម្លាំងប្រដាប់អាវុធអ៊ុយក្រែន បាននិយាយនៅព្រឹកថ្ងៃចន្ទថា រថក្រោះ ១១ គ្រឿង រថពាសដែក ១៧ គ្រឿង និងឧទ្ធម្ភាគចក្រ ៣ គ្រឿងដែលជាកម្មសិទ្ធិរបស់កងកម្លាំង ប្រដាប់អាវុធរបស់រុស្ស៊ី ត្រូវបានបំផ្លាញកាលពីថ្ងៃមុន ។

ក្នុងនោះផងដែរ រុស្ស៊ីបានបាត់បង់ប្រព័ន្ធកាំភ្លើងធំចំនួនបួន ប្រព័ន្ធរ៉ុក្កែតបាញ់ច្រើនចំនួនបី និងយន្ដហោះដ្រូន UAV យុទ្ធសាស្ត្រប្រតិបត្តិការចំនួន៧។ ប្រភពក៏បានឲ្យដឹងថា បុគ្គលិកយោធារុស្ស៊ីចំនួន ៥៩០ នាក់ បានបាត់បង់ជីវិតដែលនាំឱ្យចំនួនសរុប ត្រូវបានសម្លាប់ដល់ ១១១,៧៦០នាក់ចាប់តាំងពីសង្រ្គាម បានចាប់ផ្តើមនៅថ្ងៃទី២៤ ខែកុម្ភៈ៕