លោកស្រី Aung San Suu Kyi ត្រូវតុលាការមីយ៉ាន់ម៉ា កាត់ទោសដាក់ពន្ធនាគារ៧ឆ្នាំបន្ថែម ក្នុងសំណុំរឿងពុករលួយចំនួន៥ករណី
មីយ៉ាន់ម៉ា៖ តុលាការនៃប្រទេសមីយ៉ាន់ ដែលបច្ចុប្បន្នស្ថិតក្រោមរបបដឹកនាំយោធា បានប្រកាសសាលក្រមផ្តន្ទាទោសដាក់ពន្ធនាគារអតីតមេដឹកនាំគឺ លោកស្រី អោងសាន ស៊ូជី រយៈពេល៧ឆ្នាំបន្ថែមទៀត សម្រាប់បទល្មើសពុករលួយចំនួន៥។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី៣០ ខែធ្នូ ឆ្នាំ២០២២។
បទចោទប្រកាន់អំពើពុករលួយទាំង៥ករណីនោះ គឺពាក់ព័ន្ធទៅនឹងការជួលក៏ដូចជាជួសជុលថែទាំឧទ្ធម្ភាគចក្រ ដែលបានបណ្តាលឱ្យខាតបង់ថវិការបស់រដ្ឋ ពេលលោកស្រីនៅកាន់អំណាច។ វាគឺជាសាលក្រមចុងក្រោយគេបំផុត បន្ទាប់ពីសវនាការជំនុំជម្រះក្តីរបស់លោកស្រីបានប្រព្រឹត្តអស់រយៈពេលជាច្រើនខែមកនេះ និងពុំមានការចោទប្រកាន់បន្ថែមលើលោកស្រីទៀតឡើយ។
សូមបញ្ជាក់ថា លោកស្រីត្រូវបានតុលាការផ្តន្ទាទោស ដាក់ពន្ធនាគារសរុបយ៉ាងហោច ២៦ឆ្នាំ ក្រោមបទល្មើសជាច្រើនរួមមានចាប់ពី ការបំពានគោលការណ៍រឹតត្បិតប្រឆាំងជំងឺកូវីដ១៩, ការកាន់កាប់ឧបករណ៍វិទ្យុទាក់ទងខុសច្បាប់ រហូតដល់ការញុះញង់ឱ្យមានអំពើហិង្សា, ការល្មើសច្បាប់កិច្ចការសម្ងាត់ជាតិ និងការព្យាយាមជះឥទ្ធិពលលើគណៈកម្មការបោះឆ្នោត នៃប្រទេសមីយ៉ាន់ម៉ា៕
