ប្រទេសកុងហ្គោ ៖ មន្ត្រីយោធាប្រទេសកុងហ្គោបានអះអាងថា យ៉ាងហោចណាស់មនុស្សចំនួន ១០ នាក់​បានស្លាប់ និងរាប់សិបនាក់ផ្សេងទៀតរងរបួសនៅក្នុងហេតុការណ៍​វាយប្រហារដោយគ្រាប់បែកមួយ​នៅឯព្រះវិហារគ្រិស្តសាសនាមួយកន្លែងក្នុងទីក្រុង Kasindi ស្ថិតនៅភាគខាងកើតនៃសា​ធា​រណរដ្ឋ​ប្រជា​ធិបតេយ្យកុងហ្គោ ។

អ្នកនាំពាក្យយោធាលោក Anthony Mualushay កាលពីថ្ងៃអាទិត្យម្សិលមិញ បានបញ្ជាក់ថា ករ​ណីបំផ្ទុះគ្រាប់បែកមួយបានសម្លាប់មនុស្សចំនួន ១០នាក់ និង៣៩នាក់ផ្សេងទៀតរងរបួស ។ លោក​​បានបន្ដទៀតថា នេះគ្រាន់តែជាតួលេខបឋមតែប៉ុណ្ណាះ ដោយចំនួនអ្នកស្លា​​ប់សរុប​​អាច​នឹងកើនឡើងបន្ថែមទៀត ។

អាជ្ញាធរបានដាក់ការសង្ស័យដំបូងទៅលើក្រុមជនប្រដាប់អាវុធជ្រុលនិយមនៃ “កងកម្លាំងសម្ព័ន្ធប្រជា​ធិបតេយ្យ​  របស់ប្រទេសអ៊ូហ្គង់ដា ដែលបានចូលមកតាំងមូលដ្ឋានស្ថិតនៅក្បែរព្រំដែនប្រទេសកុងហ្គោ និងជាក្រុមដែលធ្លាប់ប្រកាសភក្តីភាពជាមួយនឹងក្រុមប្រដាប់អាវុធរដ្ឋឥស្លាម ISIS ។ ក្រោយមក បណ្ដា​ញ​ក្រុមប្រដាប់អាវុធរដ្ឋឥស្លាម ISIS ចេញមុខអះអាងទទួលខុសត្រូវ ៕