សីតុណ្ហភាពបានឡើងដល់ ៤៤.៥អង្សាសេ បណ្តាលឱ្យមនុស្សជិត១០០នាក់ស្លាប់ក្នុងរយៈពេល ៣ថ្ងៃនៅប្រទេសអេស្ប៉ាញ
អេស្ប៉ាញ៖ក្រសួងសុខាភិបាលបានឲ្យដឹងថា រលកកម្ដៅលើកដំបូងបានកើតឡើងពីថ្ងៃទី១១ ដល់ថ្ងៃទី២០ ខែមិថុនាបានឆក់យកជីវិតមនុស្ស ៨២៩នាក់នៅទូទាំងប្រទេស ដែលនៅពេលនោះសីតុណ្ហភាពបានឡើងដល់ ៤៤.៥អង្សាសេ។នេះបើតាមការចេញផ្សាយដោយសារព័ត៌មានBBC នៅថ្ងៃទី១៨ខែកក្កដា ឆ្នាំ២០២២។
វិទ្យាស្ថានសុខភាព Carlos III ដែលរាយការណ៍ទៅក្រសួងសុខាភិបាលអេស្ប៉ាញបាននិយាយកាលពីថ្ងៃសុក្រថា មនុស្ស ៨៤នាក់ត្រូវបានគេរាយការណ៍ថាបានស្លាប់ ដោយសាររលកកម្ដៅដែលបានកើតឡើងនៅប្រទេសអេស្ប៉ាញចាប់តាំងពីថ្ងៃទី១០ ខែកក្កដា។
អ្នកស្លាប់ទាំងអស់ត្រូវបានរាយការណ៍កាលពីថ្ងៃទី១០ ដល់ថ្ងៃទី១២ ខែកក្កដាដែលត្រូវបានសន្និដ្ឋានថា ដោយសារកម្ដៅក្តៅខ្លាំងលើសពី ៤០អង្សាសេនៅក្នុងតំបន់ធំៗរបស់ប្រទេស។ សីតុណ្ហភាពបានកើនឡើងលើសពី ៤៥អង្សាសេ នៅភាគខាងត្បូង និងនិរតីប្រទេស។
រលកកម្ដៅត្រូវបានគេព្យាករណ៍ថានឹងបន្តរហូតដល់សប្តាហ៍ក្រោយ ហើយចំនួនអ្នកស្លាប់ត្រូវបានគេព្រួយបារម្ភថានឹងកើនឡើង។ នេះជារលកកម្ដៅខ្លាំងទី២ ក្នុងឆ្នាំនេះនៅប្រទេសអេស្ប៉ាញ។ អាជ្ញាធរបានណែនាំឲ្យប្រជាពលរដ្ឋទទួលទានទឹកឲ្យបានច្រើន ចៀសវាងការហាត់ប្រាណច្រើនពេក និងស្នាក់នៅក្នុងលំនៅឋានឲ្យបានច្រើនតាមដែលអាចធ្វើទៅបាន៕SP
