ហ្វីលីពីន៖ ក្រុមមន្រ្តីហ្វីលីពីនបានលើកឡើងនៅព្រឹកថ្ងៃអង្គារទី៣ ខែមករា ឆ្នំា២០២៣នេះថា តួលេ​ខ​អ្នកស្លាប់ដោយសារតែទឹកជំនន់ បង្កឱ្យមានការរអិលបាក់ដីកាលពីពេ​លថ្មីៗនៅក្នុងប្រទេសហ្វីលី​ពី​ន​នេះបា​នកើនឡើងដល់៥១នាក់ហើយ ខណៈការជួយសង្គ្រោះ និងសកម្មភាពរុករកអ្នកបាត់ខ្លួ​ន​នៅតែ​បន្តធ្វើរហូតមកទល់នឹងព្រឹកថ្ងៃនេះ។

 ដោយឡែកអាជ្ញាធរមូលដ្ឋានវិញ បានធ្វើការចែកចាយកញ្ចប់ស្បៀងអាហារជូនដល់ប្រជាព​លរដ្ឋនៅ​ក្នុ​ងសហគមន៍ដែលរងផលប៉ះពាល់ខ្លំាងជាងគេ ជាពិសេសនៅក្នុងតំបន់ភាគខាងត្បូង និងភាគកណ្តា​ល​ប្រទេសហ្វីលីពីន ស្របពេលមានសេចក្តីរាយការណ៍តាមរយៈបណ្តា​ញផ្សព្វផ្សាយក្នុងស្រុ​កបានលើក​ឡើ​ងបន្តទៀត អាជ្ញាធរបានកំណត់អត្តសញ្ញាណអ្នកបាត់ខ្លួននៅសល់ចំនួន១៩នាក់ទៀត ដែលនៅមិន​ទាន់រកឃើញនៅឡើយ។

 ដោយយោងតាមសេចក្តីរាយការណ៍របស់ទីភ្នាក់ងារព័ត៌មានបារំាង(AFP) បានឱ្យដឹងបន្ថែ​មនៅព្រឹ​កនេះថា មានប្រជាពលរដ្ឋហ្វីលីពីនប្រមាណជា២សែ​ន៧ម៉ឺននាក់កំពុងតែស្វះស្វែងរកទីទួលសុវត្ថិ​ភាព​និងជម្រកជាបន្ទាន់ ខណៈទឹកភ្លៀងនៅតែបន្តបង្អុរធ្លាក់ចុះធ្វើឱ្យជន់លិចលង់​នៅក្នុងភូមិដ្ឋា​នពល​រដ្ឋ​ជាច្រើនកន្លែង បណ្តាលឱ្យផ្ទះប្រជាពលរដ្ឋច្រើនជាង៤,៥០០ខ្នងរងការខូចខាត និងផ្ទៃដីកសិក​ម្មប្រមាណជា៧,០០០ហិកតាខូចខាតយ៉ាងដំណំ៕