ជនភៀសខ្លួនរ៉ូហ៊ីងយ៉ា តាមទូក១៨៥នាក់មកដល់ច្រំាងគោកនៃប្រទេសឥណ្ឌូណេស៊ីដើម្បីគេចចេញពីការលំបាកក្នុងប្រទេសបង់ក្លាដេស
ឥណ្ឌូណេស៊ី៖ ក្រុមមន្ត្រីទីភ្នាក់ងារគ្រោះមហន្តរាយក្នុងស្រុកបានរាយការណ៍កាលពីព្រលប់ថ្ងៃអាទិត្យទី៨ ខែមករា ឆ្នំា២០២៣នេះថា មានជនភៀសខ្លួនអំបូររ៉ូហ៊ីងយ៉ាតាមទូកចំនួន១៨៥នាក់បានចូលមកដក់តំបន់ច្រំាងគោកនៅជាប់ខេត្តអាឆេ ក្នុងប្រទេសឥណ្ឌូណេស៊ី បន្ទាប់ពីក្រុមអំបូរដូចគ្នានេះបានមកដល់ប្រទេសឥណ្ឌូណេស៊ីរាប់រយនាក់កាលពីឆ្នំាមុន គោលដៅដើម្បីគេចចេញពីជំរុំជនភៀសខ្លួនដ៏លំបាកនៅក្នុងប្រទេសបង់ក្លាដេស ស្ថិតនៅក្បែរខាងប្រទេសមីយ៉ាន់ម៉ា។
ដោយយោងតាមមន្រ្តីទីភ្នាក់ងារមហន្តរាយថ្នាក់តំបន់ដដែលបានប្រាប់ដល់ទីភ្នាក់ងារព័ត៌មានរ៉យទ័រនៅល្ងាចថ្ងៃអាទិត្យចុងសប្តាហ៍នេះដែរថា ជនភៀសខ្លួនអំបូររ៉ូហ៊ីងយ៉ាដែលទើបមកដល់ថ្មីមានទំាងស្រ្តីនិងកុមារ។កាលពីខែមុនមានក្រុមអំបូរភាគតិចរ៉ូហ៊ីងយ៉ារាប់រយនាក់បានចូលមកដល់ខេត្តអាឆេ ដោយពួកគេធ្វើដំណើរតាមទូកប្រកបដោយភាពប្រថុយប្រថានដើម្បីងាកចេញពីការធ្វើទុក្ខបុកម្នេញនៅក្នុងប្រទេសមីយ៉ាន់ម៉ា។
ដោយឡែកទីភ្នាក់ងារជនភៀសខ្លួនរបស់អង្គការសហប្រជាជាតិវិញបានលើកឡើងនៅក្នុងរបាយការណ៍របស់ខ្លួនកាលពីឆ្នំា២០២២ថា ឆ្នាំ២០២២គឺជាឆ្នំាមួយដ៏លំបាកក្រៃលែងសម្រាប់ក្រុមអំបូររ៉ូហ៊ីងយ៉ាដែលធ្វើដំណើរតាមទូកឆ្លងសមុទ្រប្រកបដោយភាពគ្រោះថ្នាក់។
សូមបញ្ជាក់ថា ក្រុមអំបូរភាគតិចរ៉ូហ៊ីងយ៉ាប្រមាណជិត១លាននាក់កំពុងតែរស់នៅក្នុងស្ថានភាពណែនណាន់តាន់តាប់នៅក្នុងជំរុំជនភៀសខ្លួនក្នុងប្រទេសបង់ក្លាដេស នៅក្នុងចំណោមជនភៀសខ្លួនទំាងអស់នោះភាគច្រើនរត់គេចខ្លួនចេញពីការបង្ក្រាបដ៏ឃោរឃៅកាលពីឆ្នំា២០១៧កន្លងទៅ ដោយរបបយោធាមីយ៉ាន់ម៉ា ខណៈដែលរបបនោះបានបដិសេធថា មិនបានប្រព្រឹត្តិឧក្រិដ្ឋកម្មប្រឆំាងទៅនឹងមនុស្សជាតិឡើយ៕
