រញ្ជួយដីដ៏ខ្លាំងកម្រិត ៧.០រ៉ិចទ័របានវាយប្រហារ លើសមុទ្រខាងជើងកោះបាលី និង កោះLombok ប្រទេសឥណ្ឌូណេស៊ី
ឥណ្ឌូណេស៊ី៖ មជ្ឈមណ្ឌលតាមដានគ្រោះរញ្ជួយដីអឺរ៉ុប-ម៉េឌីទែរ៉ាណេ (EMSC) បានឱ្យដឹងថាគ្រោះរញ្ជួយដីដ៏ខ្លាំងមួយកម្រិត ៧.០រ៉ិចទ័របានវាយប្រហារ ក្នុងជម្រៅយ៉ាងជ្រៅនៅក្នុងសមុទ្រខាងជើងនៃកោះបាលី និងកោះLombok នៃប្រទេសឥណ្ឌូណេស៊ី។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។
មជ្ឈមណ្ឌលតាមដានគ្រោះរញ្ជួយដីអឺរ៉ុប-ម៉េឌីទែរ៉ាណេគ្រោះរញ្ជួយដីខាងលើមានចំណុចកណ្ដាលស្ថិតនៅចម្ងាយ ២០៣គីឡូម៉ែត្រ ពីភាគខាងជើងនៃទីក្រុងMataram និងមាន ជម្រៅ៥១៦គីឡូម៉ែត្រទៅក្រោមផ្ទៃផែនដី។
ទីភ្នាក់ងារតាមគ្រោះរញ្ជួយដីឥណ្ឌូណេស៊ី និងសហរដ្ឋអាមេរិក ដំបូងឡើយបានរាយការណ៍ដែរថា គ្រោះរញ្ជួយដីខាងលើមានកម្រិតរញ្ជួយ ៧.១ រ៉ិចទ័រ ដែលបណ្ដាលឱ្យមនុស្សម្នានាំគ្នារត់ចេញពីអគារ និងផ្ទះសម្បែង។ ប៉ុន្តែមិនមានការប្រកាសអាសន្ន ពីរលកយក្សស៊ូណាមិឡើយ។
គួរបញ្ជាក់ថា ភ្លាមៗ មិនទាន់មានសេចក្ដីរាយការណ៍ពីជនរងគ្រោះ ឬក៏ការខូចខាតដែលបង្កឡើងដោយគ្រោះរញ្ជួយដីកម្រិតធ្ងន់នេះនោះទេ៕
