អាមេរិក៖ ប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump បានអញ្ជើញប្រធានាធិបតីចិន Xi Jinping ឱ្យចូលរួមក្នុងចូលកាន់តំណែងរបស់គាត់នៅខែក្រោយ។ CBS News បានរាយការណ៍កាលពីថ្ងៃទី១១ ខែធ្នូ ឆ្នាំ២០២៤។

លោក Trump បាននិយាយនៅក្នុងបទសម្ភាសន៍មួយជាមួយ NBC News ដែលធ្វើឡើងកាលពីថ្ងៃសុក្រថាលោក "មានការចុះសម្រុងគ្នាយ៉ាងល្អ" ជាមួយលោក Xi ហើយថាពួកគាត់ "ក៏បានប្រាស្រ័យទាក់ទងគ្នាដែលក្នុងសប្តាហ៍នេះ" ។ការអញ្ជើញទៅចូលរួមពិធីថ្ងៃទី ២០ ខែមករា នៅទីក្រុងវ៉ាស៊ីនតោន បានធ្វើឡើងកាលពីដើមខែវិច្ឆិកា បន្ទាប់ពីការបោះឆ្នោតប្រធានាធិបតីថ្ងៃទី ៥ ខែវិច្ឆិកា តែគេមិនច្បាស់ថាតើវាត្រូវបានទទួលយកឬអត់នោះទេ។

ស្ថានទូតចិននៅទីក្រុងវ៉ាស៊ីនតោន មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។វានឹងក្លាយជារឿងដែលមិនធ្លាប់មានពីមុនមកសម្រាប់មេដឹកនាំចិន ដែលជាគូប្រជែងខាងភូមិសាស្ត្រនយោបាយកំពូលរបស់សហរដ្ឋអាមេរិក ក្នុងការចូលរួមពិធីឡើងកាន់តំណែងប្រធានាធិបតីសហរដ្ឋអាមេរិក។

ដោយឡែកកាលពីថ្ងៃពុធ ឯកអគ្គរដ្ឋទូតចិនប្រចាំអាមេរិកលោក Xie Feng បានអានសំបុត្រមួយច្បាប់ពីលោក Xi ក្នុងកិច្ចប្រជុំក្រុមប្រឹក្សាធុរកិច្ចអាមេរិក-ចិននៅទីក្រុងវ៉ាស៊ីនតោន ដែលក្នុងនោះមេដឹកនាំចិនបាននិយាយថា ទីក្រុងប៉េកាំងបានត្រៀមលក្ខណៈដើម្បីរក្សាទំនាក់ទំនងជាមួយសហរដ្ឋអាមេរិក។ លោក Xi បាននិយាយថា "យើងគួរតែជ្រើសរើសការសន្ទនាទល់មុខគ្នា និងកិច្ចសហប្រតិបត្តិការឈ្នះ-ឈ្នះ ក្នុងនោះលោក Xie បានបន្ថែមថា ប្រទេសទាំងពីរមិនគួរកាត់បន្ថយខ្សែសង្វាក់ផ្គត់ផ្គង់នោះទេ៕