អាហ្វហ្គានីស្ថាន៖ មេដឹកនាំកំពូលរបស់តាលីបង់លោក Mawlawi Haibatullah Akhundzada បានព្រមានជនបរទេសកុំឱ្យជ្រៀតជ្រែក នៅក្នុងប្រទេសអាហ្វហ្គានីស្ថាន។បើយោងតាមការចុះផ្សាយរបស់សារព័ត៌មានBBCនៅថ្ងៃទី០៣ ខែកក្កដា ឆ្នាំ២០២២។
មេដឹកនាំកំពូលរបស់តាលីបង់រូបនេះបានលើកឡើងក្នុងអំឡុងពេលសុន្ទរកថាដ៏កម្រមួយនៅឯការប្រមូលផ្តុំបព្វជិតឥស្លាមនៅទីក្រុងកាប៊ុល។មេដឹកនាំផ្តាច់ការបានប្រាប់សន្និសីទថា អាហ្វហ្គានីស្ថាន មិនអាចអភិវឌ្ឍដោយគ្មានឯករាជ្យទេ នេះបើយោងតាមទីភ្នាក់ងារសារព័ត៌មានរដ្ឋ Bakhtar ។
លោកបន្ថែមថា ជនបរទេស មិនគួរផ្តល់ឱ្យយើងនូវការបញ្ជារបស់ពួកគេទេ វាគឺជាប្រព័ន្ធរបស់យើង ហើយយើងមានការសម្រេចចិត្តផ្ទាល់ខ្លួនរបស់យើង។ទន្ទឹមនឹងនេះ លោក Akhundzada បានសរសើរការដណ្តើមកាន់កាប់អាហ្វហ្គានីស្ថានរបស់ពួកតាលីបង់កាលពីខែសីហា ជិតពីរទសវត្សរ៍បន្ទាប់ពីពួកគេត្រូវបានបណ្តេញចេញពីទីក្រុងកាប៊ុលដោយទាហានអាមេរិកដោយនិយាយថា ជោគជ័យនៃក្រុមជីហាតអាហ្វហ្គានីស្ថានមិនត្រឹមតែជាប្រភពនៃមោទនភាពសម្រាប់ជនជាតិអាហ្វហ្គានីស្ថានប៉ុណ្ណោះទេ ប៉ុន្តែសម្រាប់ប្រជាជនម៉ូស្លីមទាំងអស់ ជុំវិញពិភពលោក៕SP
