(ចិន)៖ក្រោយមានពាក្យចចាមអារ៉ាមថាមានការចាប់ខ្លួនសហស្ថាបនិក ក្រុមហ៊ុនAlibaba​បានធ្វើឱ្យ​ទីផ្សារ​​​ភាគ​ហ៊ុនរបស់ក្រុមហ៊ុនធ្លាក់ចុះ ១០% ដែលធ្វើឱ្យក្រុម​ហ៊ុននេះខាតបង់​ទឹកប្រាក់រហូត​ដល់​ទៅតម្លៃ 26 ពាន់លានដុល្លារ។នេះបើតាមការចេញផ្សាយដោយសារព័ត៌មាន New York Post

 ភាពជ្រួលច្របល់ក្នុងទីផ្សារភាគហ៊ុននេះ បានកើតមានឡើង ក្រោយពីស្ថានីយទូរទស្សន៍រដ្ឋចិនCCTV​ បានផ្សាយកាលពីថ្ងៃអង្គារ ទី៣ ខែឧសភាថា ជនសង្ស័យម្នាក់មានត្រកូល Maត្រូវបានឃាត់ខ្លួន តាម​ការ​សង្ស័​យពីបទបង្កអសន្តិ​សុខជាតិ  កន្លែងដែលចាប់ខ្លួនបុរសរូបនោះ គឺស្ថិតនៅក្នុងទីក្រុងហាងចូវ (Hangzhou) ដែលជាក្រុមហ៊ុន Alibaba បោះមូលដ្ឋានការិយាល័យកណ្ដាល។

 ដំណឹង​នៃ​ការ​ចាប់​ខ្លួន “បុរសដែលមាននាមត្រកូល Ma” បាន​ធ្វើ​ឲ្យ​ទីផ្សារ​មាន​ការ​ភ្ញាក់​ផ្អើល ខណៈ​អ្នក​វិនិយោគ​បាន​ចាប់​ផ្តើម​លក់​ភាគហ៊ុន Alibabaចេញជាហេតុធ្វើឱ្យ តម្លៃភាគហ៊ុនរបស់ក្រុមហ៊ុន​បាន​ធ្លាក់ចុះ​ ៩.៤% នៅក្នុងការជួញដូរដំបូងនៅហុងកុងកាលពីថ្ងៃអង្គារ នេះបើយោងតាម Bloomberg News ។

ទោះជាយ៉ាងណា អំឡុងពេលចលាចលនេះ លោក Hu Xijin អតីតអគ្គនិពន្ធនាយកកាសែតចិន Global Times បានប្រញាប់ចូលទៅបញ្ជាក់ លើបណ្ដាញទំនាក់ទំនងសង្គមចិន Weibo ថា សេចក្ដីរាយការណ៍ព័ត៌មាននោះ បានបង្កឱ្យមានការយល់ច្រឡំ ព្រោះជនសង្ស័យ ដែលត្រូវឃាត់ខ្លួនមានឈ្មោះ Ma Yun គឺមិនមែនកំពូលមហាសេដ្ឋី Jack Ma មេក្រុមហ៊ុន Alibaba នោះឡើយ។

ដើម្បីបញ្ជាក់ឱ្យកាន់តែច្បាស់បន្ថែមទៀត កាសែតGlobal Times បានចុះផ្សាយថា ជនសង្ស័យរូ​បនោះ​កើត​ក្នុងឆ្នាំ១៩៨៥ នៅក្រុងវិនចូវ (Wenzhou) បច្ចុប្បន្នមានវ័យ៣៧ឆ្នាំ និងមានមុខងារជា​នាយ​កផ្នែ​ក​ស្រា​វជ្រាវ និងអភិវឌ្ឍន៍ Hardwareនៅក្រុមហ៊ុនបច្ចេកវិទ្យាព័ត៌មាន (IT) មួយ ខណៈលោក Jack Ma កើតក្នុងឆ្នាំ១៩៦៤ នៅក្រុងហាងចូវ (Hangzhou) បច្ចុប្បន្នវ័យ៥៨ឆ្នាំ។

សូមបញ្ជាក់ថា មហាសេដ្ឋី Jack  Ma បានអវត្តមានយ៉ាងច្រើនពីវេទិការសាធារណៈចាប់តាំងពីខែវិច្ឆិកា ឆ្នាំ ២០២០ក្រោយលោកត្រូវបាននាំទៅសាកសួរ​បន្ទាប់បីលោក​ធ្វើការ​រិះគន់ធនាគារ​រប​ស់រ​ដ្ឋរបស់​ប្រទេ​ស​ចិន៕SP