ភ្នំពេញ ៖សម្ដេចតេជោ ហ៊ុន  សែន នាយករដ្ឋមន្ដ្រីនៃកម្ពុជាបានថ្លែងថាទុក្ខស្រី  ប្តីព្រាត់ធ្វើឱ្យ  សម្ដេចនិងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន  ស្រក់ទឹកភ្នែករាប់លានដំណក់ ប៉ុន្តែទឹកភ្នែកនេះ  នាំមកនូវការរស់រានមានជីវិតសម្រាប់ប្រជាជនទូទាំងប្រទេស។ 

តាមរយៈគេហទំព័រហ្វេសប៊ុកនាព្រឹកថ្ងៃទី៥  ខែមករា  ឆ្នាំ២០២១ សម្ដេចតេជោ ហ៊ុន  សែនបានឱ្យដឹងថា ថ្ងៃនេះគឺជាខួបអាពាហ៍ពិពាហ៍ ៤៦ឆ្នាំរបស់ សម្ដេច  (៥ មករា១៩៧៦- ៥ មករា  ២០២២)។

សម្ដេចតេជោ  មានប្រសាសន៍ថា  «ខ្ញុំតែងតែគិតថាអ្វីដែលខ្ញុំ  និងភរិយាបានឆ្លងកាត់ក្នុងសម័យសង្រ្គាមគឺពុំគួរឱ្យជឿថា ខ្ញុំអាចមានជីវិតរហូតមកដល់សព្វថ្ងៃនេះឡើយ។ ជីវិតយុទ្ធជនក្នុងភ្លើងសង្គ្រាម ពិសេសក្នុងរបបប្រល័យពូជសាសន៍ ប៉ុល ពតដែលយើងត្រូវតស៊ូផ្ដួលរំលំដោយយកជីវិតធ្វើដើមទុន គឺមិនមែនជារឿងសាមញ្ញនោះឡើយ»។

សម្ដេចតេជោ បន្ដថា ជីវិត ប្តី ប្រពន្ធ  បន្ទាប់ពីរៀបការគ្មានទេដែលហៅថា  សេចក្តីសុខ។ សម្ដេច បានស្លាប់កូនទី១  និងបែកគ្នាក្នុងពេលកូនទី២  នៅក្នុងផ្ទៃម្តាយ៥ខែ រហូតជួបគ្នាជាថ្មី ដែលកូនប្រុសបង (ម៉ាណែត) ហៅសម្ដេច  ថាពូអស់រយៈពេល២ខែទាំងនេះគឺសុទ្ធតែរឿងរ៉ាវមិនគ្រាន់តែសម្រាប់សម្ដេច  និងភរិយាប៉ុណ្ណោះទេ ប៉ុន្តែវាក៏ជារឿងរ៉ាវដែលបានកើតឡើងសម្រាប់ប្រជាជនកម្ពុជាទូទាំងប្រទេសដែលបានឆ្លងកាត់ក្នុងសម័យនោះផងដែរ។

សម្ដេចតេជោបញ្ជាក់ថា  «ទុក្ខស្រីប្តីព្រាត់ បានធ្វើឱ្យខ្ញុំនិងភរិយាស្រក់ទឹកភ្នែករាប់លានដំណក់។ ប៉ុន្តែទឹកភ្នែកនេះគឺបាននាំមកនូវការរស់រានមានជីវិតសម្រាប់ប្រជាជនទូទាំងប្រទេស រាប់ទាំងក្រុមគ្រួសារខ្ញុំដែរ។ ចាប់ផ្តើមពីប្តីប្រពន្ធដ៏កំសត់វ័យក្មេង២នាក់ (ពេលនោះខ្ញុំមានអាយុ២៤ឆ្នាំឯភរិយាខ្ញុំអាយុ២២ឆ្នាំ)រហូតមកដល់ពេលនេះយើងមានកូន និងចៅយ៉ាងច្រើន ប៉ុន្តែនៅតែចងចាំជានិច្ចចំពោះជីវិតតស៊ូដ៏លំបាកបំផុតរបស់ខ្ញុំនិងភរិយាជាទីស្រឡាញ់»។

សម្ដេចតេជោ  បន្ថែមទៀតថា  សៀវភៅគូព្រេងមិនព្រាត់ដែល  សម្ដេច  សរសេររៀបរាប់ពីជិវិតប្តីប្រពន្ធរបស់  សម្ដេច  ត្រូវបានបោះពុម្ភជាភាសាខ្មែរ អង់គ្លេស  និងចិន។  សម្ដេច  ថា  ភាពយន្តរឿងកូនប្រុសក្រោមពន្លឺព្រះច័ន្ទពេញបូណ៌មី  ក៍ចាប់ផ្តើមថតហើយដែរដែលអាចប្រើរយៈពេល១៤ខែ  ទើបអាចបញ្ចប់បានព្រោះជារឿងភាគដែលវែង៕EB