ប្រទេសប៉េរូ៖ អាជ្ញាធរពន្ធនាគារបានប្រកាសថា អតីតប្រធានាធិបតីប៉េរូ លោក Alberto Fujimori ដែ​ល​បានជាប់ពន្ធនាគារពីបទឧក្រិដ្ឋកម្មប្រឆាំងមនុស្សជាតិ ដែលបានប្រព្រឹត្តក្នុងកំឡុងពេលធ្វើ​ជា​​ប្រធា​នា​ធិបតីនោះ ត្រូវ បានប្រញាប់ប្រញាល់បញ្ជូនទៅកាន់មន្ទីរពេទ្យកាលពីថ្ងៃអាទិត្យ ជាលើកទីពី​រ​ក្នុងរយៈ​ពេល​មួ​យខែ។នេះ​បើតា​ម​ការចេញ​ផ្សាយដោយសារព័ត៌មានAljazeeraនៅថ្ងៃទី១៨ ខែមេសា ឆ្នាំ​២​០២​២។

 បុរសអាយុ ៨៣ ឆ្នាំរូបនេះបានជាប់ពន្ធនាគាររយៈពេល ១៥ឆ្នាំហើយ កំពុងទទួល​រងនូ​​វកា​រធ្លាក់ចុះ​នៃ​សម្ពាធឈាម និងចង្វាក់បេះដូងលោតខុសប្រក្រតី ហើយត្រូវបានបញ្ជូនទៅកាន់មន្ទីរពេទ្យជាបន្ទាន់ ។ ក្នុងនោះលោក ក៏ទទួលការវះកាត់បេះដូងក្នុងខែតុលា Fujimori មានបញ្ហាផ្លូវដង្ហើម សរសៃប្រសាទ និ​ងលើសឈាម ហើយត្រូវបានបញ្ជូនទៅមន្ទីរពេទ្យនៅថ្ងៃទី ៣ ខែមីនា បន្ទាប់ពីទទួលរងនូវជំងឺ​ចង្វា​ក់​បេះ​​​ដូងខ្លាំង។

ការភ័យខ្លាចខាងសុខភាពចុងក្រោយបង្អស់របស់ Fujimori កើតឡើងមួយសប្តាហ៍បន្ទាប់ពីតុ​លាការអ​​ន្តរអាមេ​រិកាំងសិទ្ធិមនុស្ស (IACHR) បានជំរុញប្រទេសប៉េរូឱ្យបដិសេធពីការអនុវ​ត្តសេចក្តីសម្រេចរ​បស់​តុលាការជាន់ខ្ពស់ដែលនឹងដោះលែង Fujimori ក្រោមការលើកលែងទោសប្រធានាធិបតីឆ្នាំ២០១៧ ។

 សូមបញ្ជាក់ថា លោក Fujimori ដែលជាប្រធានាធិបតីពីឆ្នាំ 1990 ដល់ឆ្នាំ 2000 ត្រូវបានជាប់គុ​កជាប​ន្តបន្ទាប់លើកា​រសម្លាប់រង្គាលដែលបានប្រព្រឹត្តដោយក្រុមសម្លាប់ទាហានក្នុងឆ្នាំ 1991 និង 1992 ក្នុងអំ​ឡុង​​ពេលនោះ មានមនុស្ស២៥ នាក់ត្រូវបានសម្លាប់នៅក្នុងប្រតិបត្តិការប្រឆាំងភេរវករ៕SP