អង្គការសហប្រជាថារដ្ឋាភិបាលស្រីលង្កាមិនគួរប្រើអំណាចរដ្ឋក្នុងគ្រាអាសន្ន ដើម្បីបង្ក្រាបការតវ៉ា ហួសហេតុពេកនោះទេ
អាមេរិក៖អ្នកនាំពាក្យការិយាល័យសិទ្ធិមនុស្សរបស់អង្គការសហប្រជាជាតិ (OHCHR) លោកស្រី Liz Throssell បានលើកឡើងអំពីរបាយការណ៍អំពើហិង្សាហួសហេតុ និងគ្មានដំណោះស្រាយរបស់នគរបាលមកលើក្រុមអ្នកតវ៉ា និងបាននិយាយថា រដ្ឋាភិបាលមិនគួរប្រើអំណាចរដ្ឋក្នុងគ្រាអាសន្នដែលបានប្រកាសរបស់ខ្លួន ដើម្បីបង្ក្រាបការតវ៉ានោះទេ។នេះបើតាមការចេញផ្សាយដោយសារព័ត៌មានAljazeeraនៅថ្ងៃទី ៧ ខែមេសា ឆ្នាំ២០២២។
ប្រទេសស្រីលង្ហាជាកោះមួយដែលមានប្រជាជនរស់នៅចំនួន ២២ លាននាក់នោះ បច្ចុប្បន្នកំពុងស្ថិតនៅក្នុងវិបត្តិសេដ្ឋកិច្ចដ៏អាក្រក់បំផុត មិនធ្លាប់មានចាប់តាំងពីទទួលបានឯករាជ្យមក។ វិបត្តិសេដ្ឋកិច្ចនៅប្រទេសនេះកើតឡើង នៅគ្រាដែលរដ្ឋាភិបាលកំពុងខ្វះខាតរូបិយបណ្ណបរទេសយ៉ាងធ្ងន់ធ្ងរដើម្បីទូទាត់សម្រាប់ការនាំចូលទំនិញសំខាន់ៗ។
បើយោងតាមក្រុមមន្ត្រី និងរបាយការណ៍ប្រព័ន្ធផ្សព្វផ្សាយធំៗកាលពីថ្ងៃព្រហស្បតិ៍ បានឲ្យដឹងថា ប្រេងម៉ាស៊ូត ដែលជាឥន្ធនៈសំខាន់សម្រាប់ចាក់រថយន្តក្រុង និងយានជំនិះពាណិជ្ជកម្មផ្សេងៗ គឺមិនមាននៅក្នុងស្តុកនៃស្ថានីយ៍ចាក់ប្រេងទូទាំងប្រទេសនោះឡើយដែលធ្វើឱ្យការដឹកជញ្ជូនសាធារណៈត្រូវបានជាប់គាំង។
សូមបញ្ជាក់ថា ប៉ូលិសស្រីលង្កាបានបាញ់ឧស្ម័នបង្ហូរទឹកភ្នែក និងកាណុងបាញ់ទឹកទៅលើបាតុកររាប់រយនាក់ ដែលព្យាយាមអុកឡុកនៅមុខផ្ទះរបស់ប្រធានាធិបតីស្រីលង្កា លោក ហ្គូតាបាយ៉ា រ៉ាចាប៉ាកសា (Gotabaya Rajapaksa) ក្នុងរដ្ឋធានីកូឡំបូ៕SP
