ស្រីលង្កា៖គណបក្សប្រឆាំងរបស់ប្រទេសស្រីលង្កាបានច្រានចោលការអញ្ជើញរបស់ប្រធានាធិបតីឱ្យបង្កើតរដ្ឋាភិបាលរួបរួមមួយ ក្រោយពលរដ្ឋបាតុកម្មឱ្យមានការលាលែងពីតំណែង ជុំវិញការខ្វះខា​​ត​ស្បៀ​ងអាហារ ប្រេងឥន្ធនៈ និងថ្នាំពេទ្យកាន់តែអាក្រក់របស់ប្រទេសនេះ។​នេះបើតាមការចេ​ញផ្សា​យ​ដោយ​សារព័ត៌មានAljazeera នៅថ្ងៃទី៥ ខែមេសា ឆ្នាំ២០២២។

ការស្នើរបស់ប្រធានាធិបតី Gotabaya Rajapaksaគឺធ្វើឡើង នៅព្រឹកថ្ងៃច័ន្ទ ដោយនិយាយថា លោក "អញ្ជើញគ​​ណបក្សន​យោបាយទាំងអស់ដែលតំណាងនៅក្នុងសភា​ឱ្យមករួមគ្នាដើម្បី​ទទួលយ​កផ​លប័ត្រ​ថ្នាក់រដ្ឋមន្ត្រី ដើម្បីស្វែងរកដំណោះស្រាយចំពោះវិបត្តិជាតិនេះ"។

ដោយឡែកគណបក្សប្រឆាំងដ៏ធំបំផុត មានគណបក្ស United People's Power ឬ Samagi Jana Balawegaya (SJB) បានច្រានចោលសំណើនេះ។

សូមបញ្ជាក់ថា ការតវ៉ាប្រឆាំងរដ្ឋាភិបាលបា​នបន្តនៅទូទាំងប្រទេសជុំ​វិញវិបត្តិសេ​ដ្ឋកិច្ចដ៏អាក្រក់​​បំផុ​​ត​របស់​ខ្លួ​ននៅក្នុងការចងចាំ និងការធ្វើ​ឱ្យមា​នកា​រមិនទុកចិត្តកាន់តែខ្លាំងលើការដឹកនាំរបស់ប្រធានាធិបតី Gotabaya Rajapaksa ។

មកដល់ពេលនេះរដ្ឋមន្ត្រីខុទ្ទកាល័យចំនួន២៦នាក់ហើយបានប្រគល់ការលាលែងពីតំណែងរបស់​ពួកគេ​កា​លពីថ្ងៃអាទិត្យ បន្ទាប់ពីមនុស្សរាប់ពាន់នាក់បានជំទាស់នឹងស្ថានភាពនៃភាពអាសន្នទូទាំងប្រទេស និងបម្រា​មគោចរ និងបានចូលរួមការតវ៉ាតាមដងផ្លូវដើម្បីបរិហាររដ្ឋាភិបាល។

រដ្ឋមន្ត្រីហិរញ្ញវត្ថុ Basil Rajapaksa និងរដ្ឋមន្ត្រីក្រសួងធារាសាស្ត្រ Chamal Rajapaksa ស្ថិ​តក្នុ​ង​ចំណោមអ្នកដែលបានលាលែងពីតំណែង រួមជាមួយនឹង រដ្ឋមន្ត្រីគឺរដ្ឋមន្ត្រីកីឡា Namal Rajapaksa ក៏ដូចគ្នាផងដែរ​៕SP