ចិន៖យន្តហោះដឹកអ្នកដំណើរមួយគ្រឿងរបស់ ក្រុមហ៊ុនអាកាសចរណ៍ចិន China Eastern មានផ្ទុកមនុស្សសរុបចំនួន១៣៣នាក់ បានធ្លាក់នៅតំបន់ភាគនិរតីនៃប្រទេសចិន ខណៈមិនទាន់ដឹងថាមានមនុស្សបាត់បង់ជីវិតប៉ុន្មាននាក់ ឬក៏អាចមានអ្នករួចរស់ជីវិត ដែរឬយ៉ាងណានោះឡើយ។នេះបើតាមការចេញផ្សាយរបស់សារព័ត៌មាន រដ្ឋចិន CCTV នៅថ្ងៃចន្ទ ទី២១ ខែមីនា ឆ្នាំ២០២២។

ទូរទស្សន៍ CCTV បាននិយាយថា យន្តហោះដែលជាប់ពាក់ព័ន្ធក្នុងឧបទ្ទវហេតុនេះ គឺជាយន្តហោះ Boeing 737 ហើយចំនួនអ្នកបាត់បង់ជីវិតមិនត្រូវបានគេដឹងភ្លាមៗនោះទេ ក្នុងនោះ ក៏ពុំមានការ បញ្ជាក់ពីមូលហេតុនៃការធ្លាក់យន្តហោះនេះទ។

ក្នុងរយៈពេលកន្លងមក ក្រុមហ៊ុនអាកាសចរណ៍ចិន China Eastern កំណត់ត្រាសុវត្ថិភាពនៃឧស្សាហកម្មអាកាសចរណ៍របស់ប្រទេសចិនគឺស្ថិតក្នុងចំណោមក្រុមហ៊ុនដ៏ល្អបំផុតនៅក្នុងពិភពលោកក្នុងរយៈពេលមួយទសវត្សរ៍កន្លងមកនេះ។

គួររំលឹកថា ឧបទ្ទវហេតុធ្លាក់យន្តហោះចុងក្រោយរបស់ប្រទេសចិនគឺក្នុងឆ្នាំ ២០១០ នៅពេលដែលមនុស្ស ៤៤ នាក់ក្នុងចំណោម ៩៦នាក់នៅលើយន្តហោះត្រូវបានសម្លាប់នៅពេលដែលយន្តហោះក្នុងតំបន់ Embraer E-190 ដែលហោះហើរដោយក្រុមហ៊ុនអាកាសចរណ៍ Henan Airlines បានធ្លាក់នៅពេលទៅដល់អាកាសយានដ្ឋាន Yichun ៕SP