BRUSSELS៖ កម្មវិធីចែករំលែកវ៉ាក់សាំងជាសាកល COVAX បានចែកចាយវ៉ាក់សាំងការពារជំងឺកូវីដ ១៩ ចំនួន ១ ពាន់លានដូស (1 billion) នេះបើយោងតាមអង្គការមួយក្នុងចំណោមអង្គការដែលគ្រប់គ្រងវាបាននិយាយកាលពីថ្ងៃសៅរ៍។

ការផ្គត់ផ្គង់ដល់ប្រទេសក្រីក្រស្ថិតក្នុងលក្ខខ័ណ្ឌមានកម្រិតយូរមកហើយ ដោយសារតែកង្វះវ៉ាក់សាំង ដោយរដ្ឋអ្នកមានបានធានាកម្រិតថ្នាំទុកដែលអាចរកបានដំបូងចាប់ពីខែធ្នូ ឆ្នាំ ២០២០។ ប៉ុន្តែនៅក្នុងត្រីមាសចុងក្រោយនេះ ការនាំចេញបានកើនឡើងជាលំដាប់ ដែលអនុញ្ញាតឱ្យ COVAX ឈានដល់ ១ ពាន់លានដូស ដែលត្រូវបានដឹកជញ្ជូនទៅកាន់ប្រទេសចំនួន ១៤៤ ប្រទេស នេះបើយោងតាម លោក Gavi ដែលជាសហដឹកនាំកម្មវិធីរួមជាមួយអង្គការសុខភាពពិភពលោក (WHO) បានអោយដឹង។

COVAX ត្រូវបានដាក់ឱ្យដំណើរការនៅឆ្នាំ ២០២០ ជាមួយនឹងគោលដៅនៃការចែកចាយថ្នាំចំនួន ២ ពាន់លានដូស នៅដំណាច់ឆ្នាំ ២០២១ ប៉ុន្តែត្រូវបានយឺតយ៉ាវដោយការស្តុកទុកដំបូងរបស់រដ្ឋដែលមានទ្រព្យសម្បត្តិស្តុកស្តម្ភ រួមទាំងការដាក់កម្រិតលើការនាំចេញ និងការផ្លាស់ប្តូរជាញឹកញាប់នៅក្នុងស្ថាប័នរបស់ខ្លួន។

កម្មវិធីនេះបានចាប់ផ្តើមផ្តល់វ៉ាក់សាំងក្នុងខែកុម្ភៈ ឆ្នាំ ២០២១។ ប្រហែល ១/៣ ត្រូវបានបរិច្ចាគដោយប្រទេសអ្នកមាន បើទោះបីជាគម្រោងដំបូងរបស់ COVAX ក្នុងការផ្គត់ផ្គង់តែថ្នាំ ដែលទទួលបានដោយផ្ទាល់ដោយកម្មវិធីនេះជាមួយនឹងថវិកាជាង ១០ ពាន់លានដុល្លារ នៅក្នុងមូលនិធិរបស់ម្ចាស់ជំនួយ។ ការផ្លាស់ប្តូរយុទ្ធសាស្រ្តបាននាំឱ្យមានការពន្យារពេល ដោយសារម្ចាស់ជំនួយតែងតែស្នើសុំឱ្យបញ្ជូនកម្រិតថ្នាំទៅកាន់ប្រទេសដែលបានជ្រើសរើសដោយពួកគេ។

គួរបញ្ជាក់ថា ទោះបីជាមានការកើនឡើងនៃការដឹកជញ្ជូននាពេលថ្មីៗនេះក៏ដោយ ក៏វិសមភាពនៃវ៉ាក់សាំងនៅតែមានកម្រិតខ្ពស់។ ទិន្នន័យចុងក្រោយរបស់អង្គការសុខភាពពិភពលោកបង្ហាញថា ៦៧% នៃចំនួនប្រជាជននៅក្នុងប្រទេសអ្នកមានត្រូវបានចាក់វ៉ាក់សាំងពេញលេញ បើធៀបនឹងប្រទេសក្រីក្រត្រឹមតែ ៥% ប៉ុណ្ណោះ ហើយជាង ៤០% នៃចំនួនប្រជាជនពិភពលោកមិនទាន់បានទទួលថ្នាំបង្ការដំបូងនៅឡើយផង។ NR