អាមេរិក៖ប្រធានាធិបតីអាមេរិក Joe Biden បានយល់ព្រម "ជាគោលការណ៍" ដើម្បីរៀបចំកិច្ចប្រជុំកំពូលជា មួយប្រធានាធិបតីរុស្ស៊ី លោក Vladimir Putin ដើម្បីពិភាក្សាអំពីវិបត្តិលើអ៊ុយក្រែន។នេះបើតាមការចេញផ្សាយដោយសារព័ត៌មានBBCនៅថ្ងៃចន្ទនេះ។

សេតវិមានបាននិយាយថា «កិច្ចចរចាដែលស្នើឡើងដោយបារាំងនឹងប្រព្រឹត្តទៅបានលុះត្រាតែរុស្ស៊ីមិនឈ្លានពានប្រទេសជិតខាង។កិច្ចប្រជុំនេះអាចផ្តល់នូវដំណោះស្រាយការទូតដែលអាចកើតមានចំពោះវិបត្តិសន្តិសុខដ៏អាក្រក់បំផុតមួយនៅក្នុងទ្វីបអឺរ៉ុបក្នុងរយៈពេលជាច្រើនទសវត្សរ៍»។សំណើនេះត្រូវបានប្រកាសដោយប្រធានាធិបតីបារាំងបន្ទាប់ពីការហៅទូរស័ព្ទពីរលើករវាងប្រធានាធិបតី Emmanuel Macron និងលោក Putin ដែលបានបន្តអស់រយៈពេលជិតបីម៉ោង។

មន្ត្រីអាមេរិកនិយាយថា ចារកម្មបង្ហាញថា រុស្ស៊ីត្រៀមខ្លួនជាស្រេចក្នុងប្រតិបត្តិការយោធាវាយប្រហាអ៊ុយក្រែណខណៈ ដែលទីក្រុងម៉ូស្គូបដិសេធ។ការដោះដូរលើកទីពីរបានកើតឡើងនៅព្រឹកថ្ងៃចន្ទ ម៉ោងនៅទីក្រុងម៉ូស្គូ ហើយបានធ្វើតាមការសន្ទនារយៈពេល ១៥ នាទីដែលលោក Macron មានជាមួយលោក Biden។

ការិយាល័យរបស់លោក Macron បាននិយាយថា ព័ត៌មានលម្អិតនៃកិច្ចប្រជុំកំពូលដែលអាចធ្វើទៅបាននឹងត្រូវបានពិភាក្សាក្នុងអំឡុងពេលកិច្ចប្រជុំរវាងរដ្ឋមន្ត្រីការបរទេសអាមេរិកលោក Antony Blinken និងរដ្ឋមន្ត្រីការបរទេសរុស្ស៊ីលោក Sergei Lavrov នៅថ្ងៃព្រហស្បតិ៍។

សេតវិមានក៏បាននិយាយផងដែរថា រុស្ស៊ីហាក់ដូចជាកំពុង "បន្តការត្រៀមលក្ខណៈសម្រាប់ការវាយលុកពេញលេញលើអ៊ុយក្រែនក្នុងពេលឆាប់ៗនេះ" ហើយថា សហរដ្ឋអាមេរិកបានត្រៀមខ្លួនជាស្រេចក្នុងការដាក់ "ផលវិបាកយ៉ាងឆាប់រហ័ស និងធ្ងន់ធ្ងរ" ប្រសិនបើវាកើតឡើង។

រដ្ឋបាលលោក Biden ប៉ាន់ប្រមាណថា រុស្ស៊ីបានប្រមូលផ្តុំកងទ័ពរហូតដល់ ១៩0,000 នាក់នៅជុំវិញអ៊ុយក្រែន រួមទាំងកងកម្លាំងបំបែកខ្លួននៅក្នុងតំបន់ Donetsk និង Luhansk នៅភាគខាងកើតអ៊ុយក្រែន។ក្រុមហ៊ុនអាមេរិក Maxar បាននិយាយថា រូបភាពផ្កាយរណបថ្មីបានបង្ហាញពីការដាក់ពង្រាយឧបករណ៍ពាសដែក និងកងទ័ពថ្មីជាច្រើនពីយោធភូមិភាគរុស្ស៊ី នៅជិតព្រំដែនជាមួយអ៊ុយក្រែន ដែលបង្ហាញពីការបង្កើនការត្រៀមលក្ខណៈយោធា៕SP