រូបភាពពីផ្កាយរណបបង្ហាញពីការដាក់ពង្រាយរថពាសដែក និងកងទ័ពថ្មីជាច្រើនរបស់រុស្សី នៅជិតអ៊ុយក្រែន
រុស្សី៖ក្រុមហ៊ុនឯកជនមួយរបស់សហរដ្ឋអាមេរិកបាននិយាយកាលពីថ្ងៃអាទិត្យថា«បើតាម រូបភាពពីផ្កាយរណបបង្ហាញពីការដាក់ពង្រាយរថពាសដែក និងកងទ័ពថ្មីជាច្រើនកន្លែងពីយោធភូមិភាគរុស្ស៊ីនៅជិតព្រំដែនជាមួយអ៊ុយក្រែន ដែលបង្ហាញពីការបង្កើនការត្រៀមខ្លួនខាងយោធា»។
សកម្មភាពថ្មីនេះកើតឡើងនៅពេលដែលរុស្ស៊ីបានពង្រីកសមយុទ្ធយោធានៅក្នុងប្រទេសបេឡារុស្ស ដោយបង្កើនការភ័យខ្លាចក្នុងចំណោមមហាអំណាចលោកខាងលិចជុំវិញការឈ្លានពានរបស់រុស្ស៊ី នៅអ៊ុយក្រែន។ ជាក់ស្តែង រូបភាពដែលចេញផ្សាយដោយ Maxar Technologies ដែលមានមូលដ្ឋាននៅសហរដ្ឋអាមេរិក បានតាមដានការកសាងកងកម្លាំងរុស្ស៊ីអស់ជាច្រើនសប្តាហ៍ ប៉ុន្តែមិនអាចផ្ទៀងផ្ទាត់ជាលក្ខណៈឯករាជ្យដោយទីភ្នាក់ងារសារព័ត៌មានរ៉យទ័របានទេ។
យ៉ាងណាម៉ិញ Maxar Technologies បាននិយាយនៅក្នុងការចេញផ្សាយកាលពីថ្ងៃអាទិត្យថា "សកម្មភាពថ្មីនេះតំណាងឱ្យការផ្លាស់ប្តូរគំរូនៃការដាក់ពង្រាយក្រុមប្រយុទ្ធដែលបានសង្កេតឃើញពីមុន (រថក្រោះ រថពាសដែក កាំភ្លើងធំ និងឧបករណ៍ជំនួយ)" ។ការដាក់ពង្រាយក្រុមប្រយុទ្ធដ៏ធំជាច្រើនត្រូវបានគេសង្កេតឃើញនៅជុំវិញយោធភូមិភាគនៅ Soloti ប្រទេសរុស្ស៊ី គិតត្រឹមថ្ងៃទី ១៣ ខែកុម្ភៈ យោងតាមរូបភាពពីផ្កាយរណប Maxar បានអោយដឹង។
ដោយឡែក រូបភាពកាលពីថ្ងៃអាទិត្យបានបង្ហាញពីអង្គភាពប្រយុទ្ធ និងឧបករណ៍ជំនួយភាគច្រើននៅ Soloti បានចាកចេញ។ ក្រុមហ៊ុនក៏បាននិយាយថា ផ្លូវរថយន្តធំទូលាយ និងក្បួនរថយន្តពាសដែកមួយចំនួនត្រូវបានគេឃើញពាសពេញតំបន់នោះ។
គ្រឿងបរិក្ខារមួយចំនួនក៏ត្រូវបានដាក់ពង្រាយនៅភាគខាងកើតនៃតំបន់ក្បែរ Valuyki នៃប្រទេសរុស្ស៊ី ក្នុងចំការប្រហែល ១៥ គីឡូម៉ែត្រ (៩ ម៉ាយល៍) ភាគខាងជើងនៃព្រំដែនអ៊ុយក្រែន។ Maxar ក៏បាននិយាយទៀតថា ការដាក់ពង្រាយថ្មីមួយចំនួនក៏ត្រូវបានគេមើលឃើញនៅភាគពាយព្យនៃទីក្រុង Belgorod នៃប្រទេសរុស្ស៊ីផងដែរ។ NR
