អឺរ៉ុប៖ ប្រធានគណៈកម្មការអឺរ៉ុប លោកស្រី អួរស៊ូឡា វ៉ុនឌែ ឡេយេន បាននិយាយថា សហភាពអឺរ៉ុបបានត្រៀមខ្លួនរួចជាស្រេចក្នុងការពង្រឹងកិច្ចសហប្រតិបត្តិការជាមួយហ្វីលីពីនលើសន្តិសុខដែនសមុទ្រ។នេះបើយោងតាមការចុះផ្សាយដោយទីភ្នាក់ងារសារព័ត៌មាន Reuters នៅថ្ងៃទី៣១ កក្កដា ២០២៣។

លោកស្រី វ៉ុនឌែ ឡេយេន ថ្លែងយ៉ាងដូច្នេះ បន្ទាប់ពីជំនួបជាមួយប្រធានាធិបតីហ្វីលីពីន លោក ហ្វឺឌីណាន់ ម៉ាកូស ជូនៀរ នៅទីក្រុងម៉ានីល។ 

លោកស្រីនិយាយក្នុងសេចក្តីថ្លែងការណ៍រួមមួយជាមួយលោក ម៉ាកូស ថា «យើងត្រៀមខ្លួនជាស្រេច ក្នុងការពង្រឹងកិច្ចសហប្រតិបត្តិការជាមួយហ្វីលីពីនលើសន្តិសុខដែនសមុទ្រក្នុងតំបន់ ដោយធ្វើការចែករំលែកព័ត៌មាន វាយតម្លៃការគំរាមកំហែង និងកសាងសមត្ថភាពឆ្មាំឆ្នេរសមុទ្ររបស់អ្នក(ហ្វីលីពីន)»។

គួរបញ្ជាក់ថា ការប្ដេជ្ញាយ៉ាងដូច្នេះរបស់សហភាពអឺរ៉ុប ធ្វើឡើងចំពេលដែលភូមិសាស្រ្តនយោបាយបន្តតានតឹង។ ហ្វីលីពីនគឺជាប្រទេសដែលពោរពេញដោយការប្រកួតប្រជែងភូមិសាស្ត្រនយោបាយរវាងសហរដ្ឋអាមេរិក និងចិន ខណៈបញ្ហាដែនសមុទ្ររបស់ប្រទេសនេះនៅសមុទ្រចិនខាងត្បូង ដែលជាផ្លូវទឹកជាយុទ្ធសាស្ត្រ និងសម្បូរដោយធនធាន រងទំនាស់ជាមួយចិន ដែលទាមទារការត្រួតត្រាលើផ្ទៃសមុទ្រស្ទើរតែទាំងមូល៕