សេអ៊ូល៖ ប្រទេសកូរ៉េខាងជើងនៅថ្ងៃអាទិត្យបានថ្កោលទោសការលើកឡើងរបស់រដ្ឋមន្ត្រីការពារជាតិកូរ៉េខាងត្បូងអំពីសមត្ថភាពវាយប្រហារប្រឆាំងនឹងកូរ៉េខាងជើង ហើយបានព្រមានថា ខ្លួននឹងបំផ្លាញគោលដៅសំខាន់ៗក្នុងទីក្រុងព្យុងយ៉ាង ប្រសិនបើកូរ៉េខាងត្បូងចាត់វិធានការ "យោធាដ៏គ្រោះថ្នាក់" ដូចជាការវាយប្រហារទុកជាមុន។ នេះបើយោងតាមការចុះផ្សាយដោយទីភ្នាក់ងារសារព័ត៌មាន Reuters នៅថ្ងៃទី០៣ មេសា ២០២២។

អ្នកនាង Kim Yo Jong ដែលជាប្អូនស្រីរបស់មេដឹកនាំកូរ៉េខាងជើង Kim Jong Un បាននិយាយនៅក្នុងសេចក្តីថ្លែងការណ៍មួយថា ការលើកឡើងរបស់រដ្ឋមន្ត្រីការពារជាតិកូរ៉េខាងត្បូង "កាន់តែធ្វើឱ្យទំនាក់ទំនងអន្តរកូរ៉េ និងភាពតានតឹងផ្នែកយោធានៅលើឧបទ្វីបកូរ៉េកាន់តែអាក្រក់ទៅៗ" 

រដ្ឋមន្ត្រីការពារជាតិកូរ៉េខាងត្បូង លោក Suh Wook បាននិយាយកាលពីថ្ងៃសុក្រថា យោធារបស់ប្រទេសលោកមានកាំជ្រួចជាច្រើនប្រភេទ ជាមួយនឹងកម្រិតបាញ់កាន់តែប្រសើរឡើង ភាពត្រឹមត្រូវ និងថាមពល ជាមួយនឹង "សមត្ថភាពក្នុងការបាញ់បានយ៉ាងត្រឹមត្រូវ និងរហ័សនូវគោលដៅណាមួយនៅក្នុងប្រទេសកូរ៉េខាងជើង" ។

លោក Suh Wook ក៏បាននិយាយផងដែរថា ក្រសួងនឹងគាំទ្រយ៉ាងសកម្មដល់យោធា ដើម្បីធានាថា ខ្លួនមានសមត្ថភាពឆ្លើយតបយ៉ាងលើសលប់ចំពោះការគំរាមកំហែងមីស៊ីលរបស់កូរ៉េខាងជើង។ 

ភាពតានតឹងនៅក្នុងឧបទ្វីបកូរ៉េបានកើនឡើងយ៉ាងខ្លាំងក្នុងរយៈពេលប៉ុន្មានសប្តាហ៍ថ្មីៗនេះ បន្ទាប់ពីកូរ៉េខាងជើងបានសាកល្បងកាំជ្រួចផ្លោងចំនួនពីរកាលពីថ្ងៃទី 26 ខែកុម្ភៈ និងថ្ងៃទី 4 ខែមីនា ដែលពាក់ព័ន្ធនឹងប្រព័ន្ធ ICBM ថ្មីដែលប្រទេសកំពុងអភិវឌ្ឍ ហើយខណៈដែលខ្លួនបានធ្វើតេស្ត ICBM ពេញលេញ ជាលើកដំបូងចាប់តាំងពីឆ្នាំ 2017 ។ 

បន្ទាប់ពីការសាកល្បងនេះ សហរដ្ឋអាមេរិកកាលពីថ្ងៃសុក្របានដាក់ទណ្ឌកម្មលើអង្គភាពចំនួនប្រាំដែលខ្លួនបានចោទប្រកាន់ថាបានផ្តល់ការគាំទ្រដល់ការអភិវឌ្ឍអាវុធប្រល័យលោក និងកម្មវិធីមីស៊ីលផ្លោងរបស់ប្រទេសកូរ៉េខាងជើង។ 

យ៉ាងណាមិញ ប្រធានាធិបតីជាប់ឆ្នោតកូរ៉េខាងត្បូង Yoon Suk-yeol នឹងត្រូវចូលកាន់តំណែងនៅខែក្រោយនេះ បានអំពាវនាវឱ្យបង្កើនការរារាំងខាងយោធា រួមទាំងតាមរយៈការពង្រឹងទំនាក់ទំនងជាមួយសហរដ្ឋអាមេរិក និងបានប្តេជ្ញាថានឹងស្វែងរកការបង្កើតបណ្តាញសន្ទនាបីជាអចិន្ត្រៃយ៍រវាងកូរ៉េខាងត្បូង កូរ៉េខាងជើង និងសហរដ្ឋអាមេរិក។RT