ស្ទឹងត្រែង ៖ ជនសង្ស័យ ២នាក់ ត្រូវបានសមត្ថកិច្ចនគរបាលមន្ទីរប្រឆាំងគ្រឿងញៀន សហការជាមួយកម្លាំងនគរបាលខេត្តស្ទឹងត្រែង ស្រាវជ្រាវបង្ក្រាបករណីបទល្មើសគ្រឿងញៀនចាប់យកវត្ថុតាងថ្នាំញៀនប្រមាណ ៤១គីឡូក្រាម ។
សមត្ថកិច្ចនគរបាលមន្ទីរប្រឆាំងគ្រឿងញៀន ប្រាប់ឲ្យដឹងថា កាលពីវេលាម៉ោង២០ និង១០នាទី យប់ថ្ងៃទី ១៤ ខែមករា ឆ្នាំ២០២១ កម្លាំងជំនាញ (ក៩) នៃមន្ទីរប្រឆាំងបទល្មើសគ្រឿងញៀន ដឹកនាំដោយលោកនាយករង យិន បញ្ញារិទ្ធ សហការជាមួយកម្លាំងជំនាញរបស់ស្នងការដ្ឋាននគរបាល ខេត្តស្ទឹងត្រែង ដោយមានការសម្រប សម្រួលពីលោកព្រះរាជអាជ្ញា ជេត ខេមរា បានបើកការស៊ើបអង្កេត ស្រាវជ្រាវបង្រ្កាបករណីដឹកជញ្ជូន ជួញដូរ គ្រឿងញៀនឆ្លងដែនខុសច្បាប់ នៅចំណុច ស្ពានទី២ (ច្រករបៀង) ស្ថិតក្នុងភូមិអូរស្វាយ ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង (ចម្ងាយប្រមាណជិត ២គ.ម ពីច្រកទ្វារអន្តរជាតិ ត្រពាំងគ្រៀល) ។
ក្នុងរង្វង់ប្រតិបត្តិការនេះ សមត្ថកិច្ចឃាត់ខ្លួនជនសង្ស័យ ២នាក់ (ប្រុស) ចាប់យកវត្ថតាង រួមមាន មេតំហ្វេតាមីន (ICE) ចំនួន ៤១ កញ្ទប់ធំ ស្មើរទម្ងន់ប្រមាណ ៤១គីឡូក្រាម ដែលជនល្មើសទម្លាក់ទុកក្នុងព្រៃ ។
ប្រភពព័ត៌មាន ប្រាប់បន្តថា ចំពោះករណីនេះកម្លាំង BLO បានសហការជូនព័ត៌មានទៅកម្លាំងជំនាញរបស់ ភាគីឡាវ ដើម្បីស្រាវជ្រាវឃាត់មេខ្លោង និងគូរកន ដែលរត់គេច ហើយភាគីឡាវក៏ ឃាត់បានរថយន្ត ចំនួន ៥គ្រឿង និងមនុស្សមួយចំនួនផងដែរ ៕
