អាមេរិក៖រថយន្តមួយគ្រឿងប្រភេទSports Utility Vehicle (SUV)ពណ៌ក្រហម បានបើកយ៉ាងលឿនកាត់របាំងផ្លូវ ទៅជល់នឹងក្បួនដង្ហែបុណ្យណូអែលនៅរដ្ឋWisconsinសហដ្ឋអាមេរិក កាលពីល្ងាចថ្ងៃអាទិត្យ បណ្តាលឱ្យមនុស្សមួយចំនួនស្លាប់និងមនុស្សជាង២០នាក់ផ្សេងទៀតរងរបួស។នេះបើតាមការចុះផ្សាយដោយសារព័ត៌មាន The Guardian នៅថ្ងៃទី២២ ខែវិច្ឆិកា ឆ្នាំ២០២១។

វីដេអូដ៏គួរឱ្យភ័យខ្លាចដែលត្រូវបានបង្ហោះក្នុងប្រព័ន្ធផ្សព្វផ្សាយសង្គមបង្ហាញពីរថយន្ត SUV ពណ៌ក្រហមដែលមានល្បឿនលឿនបុកជាមួយមនុស្សមួយក្រុមដែលដើរឆ្លងកាត់ផ្លូវក្នុងអំឡុងពេលក្បួនដង្ហែបុណ្យណូអែលប្រចាំឆ្នាំនៅទីក្រុង Waukesha សហរដ្ឋអាមេរិក។

មេប៉ូលិសក្រុង Waukesha លោក Dan Thompson បានប្រាប់សន្និសីទសារព័ត៌មានកាលពីយប់ថ្ងៃអាទិត្យថា រថយន្តប្រភេទ SUV ពណ៌ក្រហមមួយគ្រឿងបានបើកក្នុងល្បឿនយ៉ាងលឿនចូលទៅក្នុងការហែក្បួននៅ ដែលបណ្តាលឱ្យ "អ្នកស្លាប់មួយចំនួន" និងមនុស្សជាង ២0 នាក់រងរបួស។លោក បន្តថា មនុស្សពេញវ័យ ១១នាក់ និងកុមារ ១២ នាក់ត្រូវបានបញ្ជូនទៅមន្ទីរពេទ្យ ដោយបដិសេធមិនផ្តល់ព័ត៌មានលម្អិតបន្ថែមអំពីចំនួនអ្នកស្លាប់ និងរបួសរហូតដល់ក្រុមគ្រួសារត្រូវបានជូនដំណឹង។

លោកបន្ថែមថា«យើងកំពុងធ្វើការជាមួយក្រុមគ្រួសារ នោះជាអាទិភាពក្នុងឧបទ្ទវហេតុនេះ»។ការស៊ើបអង្កេតនៅតែបន្ត ចំពោះដើមចម ថាតើឧបទ្ទវហេតុនេះទាក់ទងនឹងភេរវកម្មឬយ៉ាងណានោះទេ។ ទោះបីជាយ៉ាងណាជនល្មើសត្រូវបានឃុំខ្លួនហើយ ៕SP