ប្រទេសចិនចេញសារណែនាំដល់ពលរដ្ឋចិនទាំងអស់ ត្រូវស្តុកទុករបស់របរសំខាន់ៗប្រចាំថ្ងៃ ពិសេសគឺស្បៀងអាហារដែលចាំបាច់បំផុត មុនពេលរដូវរងាមកដល់
(ចិន)៖ រដ្ឋាភិបាលចិន បានប្រាប់ក្រុមគ្រួសារឲ្យរក្សាទុកនូវរបស់របរប្រចាំថ្ងៃសំខាន់ៗនៅក្នុងផ្ទះ ក្នុងករណីគ្រាអាសន្ន បន្ទាប់ពីការផ្ទុះឡើងនូវជំងឺរាតត្បាត និងការធ្លាក់ភ្លៀងខុសពីប្រក្រតីដែលបណ្តាលឲ្យតម្លៃបន្លែឡើងថ្លៃយ៉ាងខ្លាំងដោយធ្វើឲ្យមានការព្រួយកង្វល់អំពីការផ្គត់ផ្គង់មិនគ្រប់គ្រាន់។
បើតាមសេចក្តីរាយការណ៍របស់ទីភ្នាក់ងារព័ត៌មាន Reuters នៅថ្ងៃទី០២ ខែវិច្ឆិកា ឆ្នាំ២០២១បានឱ្យដឹងថា សារាចរណែនាំរបស់ក្រសួងពាណិជ្ជកម្មចិន ដែលត្រូវបានផ្សព្វផ្សាយកាលពីយប់ថ្ងៃចន្ទ បានធ្វើឲ្យមានការព្រួយកង្វល់ ដែលអាចបណ្តាលមកពីភាពតានតឹងយ៉ាងខ្លាំងជាមួយកោះតៃវ៉ាន់ ខណៈដែលអ្នកខ្លះទៀត បាននិយាយថា មនុស្សបានសម្រុកទៅទិញអង្ករ ប្រេងឆា និងអំបិលដើម្បីស្តុកទុកនោះ។
អ្នកប្រើប្រាស់នៅលើបណ្តាញ Twitter ក្នុងប្រទេសចិន ដូចជាបណ្តាញសង្គម Weibo ជាដើម បានសរសេរថា «នៅពេលដែលព័ត៌មាននេះ ត្រូវបានចេញផ្សាយភ្លាមនោះ មនុស្សទាំងអស់នៅជិតខ្ញុំ បាននាំគ្នាទៅទិញទំនិញនៅផ្សារទំនើបយ៉ាងតក់ក្រហល់»។បណ្តាញព័ត៌មានក្នុងស្រុក កាលពីពេលថ្មីៗនេះ ក៏បានចេញផ្សាយបញ្ជីរបស់ទំនិញដែលស្នើឲ្យស្តុកទុកនៅតាមផ្ទះ រួមមាននំបារាំង មី ថ្នាំវីតាមីន វិទ្យុ និងពិលបំភ្លឺជាដើម។
សេចក្តីថ្លែងការណ៍របស់ក្រសួងពាណិជ្ជកម្មចិន កាលពីយប់ថ្ងៃចន្ទ បានជំរុញឲ្យពួកអាជ្ញាធរធ្វើការងារឲ្យបានល្អដើម្បីធ្វើឲ្យប្រាកដថា ការផ្គត់ផ្គង់ និងតម្លៃមានស្ថិរភាព ហើយនឹងផ្តល់ការព្រមានឲ្យបានរួសរាន់នៅពេលមានបញ្ហានៃការផ្គត់ផ្គង់នោះ៕PP
