មន្រ្តីក្រសួងការពារជាតិអាមេរិកកំពុងបដិសេធមិនបញ្ជាក់អំពីរបាយការណ៍ដែលថាកងកម្លាំងអាមេរិកនៅកោះតៃវ៉ាន់ បង្ហាត់កងទ័ពតៃវ៉ាន់ដោយសម្ងាត់
(អាមេរិក)៖មន្រ្តីក្រសួងការពារជាតិអាមេរិកកំពុងបដិសេធមិនបញ្ជាក់អំពីរបាយការណ៍ដែលថា កងកម្លាំងអាមេរិកនៅកោះតៃវ៉ាន់ បង្ហាត់កងទ័ពតៃវ៉ាន់ដោយសម្ងាត់ ដើម្បីត្រៀមខ្លួនក្នុងករណីមានការវាយប្រហារពីប្រទេសចិន។ កាសែត The Wall Street Journal កាលពីថ្ងៃព្រហស្បតិ៍បានរាយការណ៍ថា ក្រសួងការពារជាតិស.រ.អា.មានកងទ័ពប្រតិបត្តិការពិសេសប្រមាណជាង២០នាក់ដែលកំពុងធ្វើការជាមួយអង្គភាពមួយចំនួននៃកងកម្លាំងប្រដាប់អាវុធតៃវ៉ាន់ ខណៈកងម៉ារីនអាមេរិកាំងមួយក្រុមកំពុងបណ្តុះបណ្តាលកងកម្លាំងផ្សេងទៀតអំពីយុទ្ធសាស្ត្រលើសមុទ្រ។
មន្រ្តីសហរដ្ឋអាមេរិកដែលប្រាប់កាសែត The Wall Street Journal ដោយមិនបញ្ចេញឈ្មោះបាននិយាយថា កងកម្លាំងអាមេរិកបានចូលរួមក្នុងប្រតិបត្តិការហ្វឹកហ្វឺនយ៉ាងហោចណាស់មួយឆ្នាំចុងក្រោយនេះ។ មន្រ្តីក្រសួងការពារជាតិស.រ.អា. នៅថ្ងៃព្រហស្បតិ៍ បានបដិសេធមិនបញ្ជាក់អំពីរបាយការណ៍នេះទេ ទោះបីជាយ៉ាងណា អ្នកនាំពាក្យម្នាក់បាននិយាយថា ទំនាក់ទំនងអាមេរិក-តៃវ៉ាន់ «នៅតែប្រឆាំងការគំរាមកំហែងនាពេលបច្ចុប្បន្ន បង្កឡើងដោយសាធារណរដ្ឋប្រជាមានិតចិន»។
មន្រ្តីអាមេរិកបានសម្តែងការព្រួយបារម្ភកាន់តែខ្លាំងឡើងៗនាពេលថ្មីៗនេះ ដោយនិយាយថា អាកប្បកិរិយារបស់ចិនចំពោះកោះតៃវ៉ាន់កាន់តែគឃ្លើននិងប្រទូសរាយ។ ការព្រួយបារម្ភនេះកើនឡើង ដោយសារក្រុងប៉េកាំងលុកលុយម្តងហើយម្តងទៀត ដោយបានបញ្ជូនយន្តហោះយោធាជាង ១៥០ គ្រឿងចូលទៅក្នុងដែនអាកាសតៃវ៉ាន់ក្នុងរយៈពេលជាច្រើនថ្ងៃនេះ។
ប្រព័ន្ធផ្សព្វផ្សាយរដ្ឋចិនបានសម្តែងការខឹងសម្បាយ៉ាងឆាប់រហ័សចំពោះរបាយការណ៍ដែលថា កងកម្លាំងពិសេសអាមេរិកកំពុងបំពេញបេសកកម្មបណ្តុះបណ្តាលសម្ងាត់នៅតៃវ៉ាន់។ លោក Hu Xijin និពន្ធនាយកសារព័ត៌មាន Global Times របស់គណបក្សកុម្មុយនិស្តចិនបានសរសេរនៅលើ Twitter កាលពីថ្ងៃព្រហស្បតិ៍ថា«ហេតុអ្វីមានតែដប់ម្ភៃនាក់? ហេតុអ្វីបានជាសម្ងាត់?»៕
