អាមេរិកនិងសម្ព័ន្ធមិត្តអឺរ៉ុបរកផ្លូវដោះស្រាយក្រោយកិច្ចព្រមព្រៀងនាវាមុជទឹកអូស្ត្រាលី
(វ៉ាស៊ីនតោន)៖សហរដ្ឋអាមេរិកនិងសម្ព័ន្ធមិត្តអឺរ៉ុបកំពុងរកផ្លូវដោះស្រាយការរំខានផ្នែកការទូតបន្ទាប់ពីអូស្ត្រាលី ចក្រភពអង់គ្លេសនិងសហរដ្ឋអាមេរិកធ្វើកិច្ចព្រមព្រៀងភាពជាដៃគូសន្តិសុខត្រីភាគីហៅកាត់ថា AUKUSដែលបង្កឱ្យមន្រ្តីបារាំងបានពិពណ៌នាថា«វិបត្តិនៃការទុកចិត្ត»រវាងរដ្ឋាភិបាលក្រុងប៉ារីសនិងរដ្ឋាភិបាលក្រុងវ៉ាស៊ីនតោន។
កិច្ចព្រមព្រៀងសន្តិសុខថ្មីនោះ អូស្រ្តាលីនឹងធ្វើនាវាមុជទឹកប្រើថាមពលនុយក្លេអ៊ែរយ៉ាងតិច៨គ្រឿងប្រើបច្ចេកវិទ្យាអាមេរិក។ កិច្ចព្រមព្រៀងនេះធ្វើឡើងនៅពេលអូស្ត្រាលីដកខ្លួនចេញពីកិច្ចព្រមព្រៀងជាមួយបារាំងធ្វើនាវាមុជទឹកប្រើថាមពលម៉ាស៊ូត-អគ្គិសនី ហើយរដ្ឋាភិបាលក្រុងប៉ារីសខឹងសម្បា។ បារាំងបានកោះហៅឯកអគ្គរដ្ឋទូតរបស់ខ្លួនទៅអាមេរិកនិងអូស្ត្រាលី។
អ្នកជំនាញខ្លះបាននិយាយថា ខណៈមន្រ្តីអឺរ៉ុបបានទទួលស្គាល់ថា កិច្ចព្រមព្រៀងភាពជាដៃគូសន្តិសុខត្រីភាគីអូស្ត្រាលី ចក្រភពអង់គ្លេសនិងសហរដ្ឋអាមេរិក(AUKUS) ត្រូវបានប្រកាសជាចម្បងដោយផ្តោតលើប្រទេសចិននោះ ផ្នែកមួយនៃប្រតិកម្មរបស់បារាំងត្រូវបានជំរុញដោយការវាយតម្លៃនយោបាយក្នុងស្រុក ព្រោះប្រទេសបារាំងមានឧស្សាហកម្មផ្នែកការពារជាតិដែលមានទំហំធំ ហើយរដ្ឋាភិបាលរបស់លោកប្រធានាធិបតីEmmanuel Macron ត្រូវបង្ហាញថា ខ្លួនកំពុងប្រយុទ្ធដើម្បីឧស្សាហកម្មនេះ។
កាលពីថ្ងៃពុធ រដ្ឋមន្ត្រីការបរទេសអាមេរិកលោក Antony Blinken បានជួបជាមួយប្រធានគោលនយោបាយការបរទេសសហភាពអឺរ៉ុបលោក Josep Borrell នៅក្រៅមហាសន្និបាតអង្គការសហប្រជាជាតិ។នៅក្នុងសេចក្តីថ្លែងការណ៍មួយក្រសួងការបរទេសស.រ.អា.បាននិយាយថា« លោករដ្ឋមន្ត្រីបានទទួលស្វាគមន៍ការចេញផ្សាយយុទ្ធសាស្ត្ររបស់សហភាពអឺរ៉ុបសម្រាប់កិច្ចសហប្រតិបត្តិការនៅឥណ្ឌូ-ប៉ាស៊ីហ្វិកនាពេលថ្មីៗនេះនិងបានបញ្ជាក់ម្តងទៀតពីបំណងរបស់សហរដ្ឋអាមេរិកធ្វើការយ៉ាងជិតស្និទ្ធជាមួយសហភាពអឺរ៉ុបនិងដៃគូដទៃទៀតដើម្បីគាំទ្រតំបន់ឥណ្ឌូប៉ាស៊ីហ្វិកសេរីនិងបើកចំហ»។
កិច្ចប្រជុំនេះបានធ្វើឡើងក្រោយពីការនិយាយតាមទូរស័ព្ទរវាងលោកប្រធានាធិបតី Joe Biden និងលោក ប្រធានាធិបតីMacron ដែលមេដឹកនាំទាំងពីរបានសម្រេចចិត្ត«បើកដំណើរការការពិគ្រោះយោបល់ស៊ីជម្រៅ» ដើម្បីធានាឱ្យមាន«ទំនុកចិត្ត»។
លោក Macron បានសម្រេចថា ឯកអគ្គរដ្ឋទូតបារាំងនឹងត្រឡប់មកទីក្រុងវ៉ាស៊ីនតោនវិញនៅសប្តាហ៍ក្រោយ។ លោកBiden បានបញ្ជាក់សារជាថ្មីនូវសារៈសំខាន់ជាយុទ្ធសាស្ត្រនៃការចូលរួមរបស់បារាំងនិងអឺរ៉ុបនៅក្នុងតំបន់ឥណ្ឌូ-ប៉ាស៊ីហ្វិក៕
