(អ៊ីស្រាអែល)៖លោកណេតាន់យ៉ាហ៊ូ ដែលបានកាន់តំណែងនាយករដ្ឋមន្ត្រី ១២ឆ្នាំកន្លងមកនេះ នឹងត្រូវ​បិទបញ្ចប់ឆាកនយោបាយរបស់ខ្លួនហើយ ដោយសារតែ​ ក្រុមអ្នកនយោបាយ​ផ្សេងទៀត បានរួមគ្នាបង្កើតរដ្ឋាភិបាលចម្រុះ និង​​មិនសហការជាមួយ​រូបលោក។នេះបើតាមការចុះផ្សាយដោយBBC។កាលពីថ្ងៃអាទិត្យ ទី​១៣មិថុនា សភាអ៊ីស្រាអែល នឹងបើកសម័យប្រជុំពិសេសមួយ ដើម្បីបោះឆ្នោត​​ផ្តល់​សេចក្តី​ទុកចិត្ត ដល់រដ្ឋាភិបាលថ្មី ដែលនឹងត្រូវដឹកនាំដោយ​នាយករដ្ឋមន្ត្រី២នាក់ ផ្លាស់វេនគ្នា ១៨ខែម្នាក់។

រដ្ឋាភិបាលថ្មី នឹងដឹកនាំដោយនាយករដ្ឋមន្ត្រី២នាក់ ផ្លាល់វេនគ្នា គឺលោក Naftali Bennett មកពីគណបក្សស្តាំនិយម Yamina ដែលនឹងដឹកនាំ​រដ្ឋាភិបាល១៨ខែដំបូង បន្ទាប់មកទៀត គឺលោក Yair Lapid មកពីបក្សកណ្តាលនិយម ដែលនឹងមកធ្វើជានាយករដ្ឋមន្ត្រី១៨​ខែ​បន្ទាប់។

ក្រោយការបោះឆ្នោតនៅខែ​មីនា អ៊ីស្រាអ៊ែលបានជាប់គាំងនយោបាយ ដោយសារតែគ្មានគណបក្សណាមួយ បានសម្លេងភាគច្រើនក្នុងសភា។ ការចរចានយោបាយ បានចាប់ផ្តើមឡើងយ៉ាងសស្រាក់សស្រាំ ដោយលោកប៊ីនយ៉ាមីន ណេតាន់យ៉ាហ៊ូ បានព្យាយាមអូសទាញគេឯង ឲ្យចូលរួមបង្កើតរដ្ឋាភិបាលចម្រុះជាមួយខ្លួន។ តែទីបំផុត លោកណេតាន់យ៉ាហ៊ូ និងគណបក្សលីគូត​ ត្រូវបាន​​អ្នកនយោបាយ​ផ្សេងៗទៀត បោះបង់ចោល ហើយងាកទៅផ្គុំគ្នាដាច់ដោយឡែក ដើម្បី​រារាំង មិនឲ្យ​លោក​ណេតាន់យ៉ាហ៊ូ បន្តតំណែងជានាយករដ្ឋមន្ត្រី។

គួរបញ្ជាក់ថា លោកប៊ីនយ៉ាមីន ណេតាន់យ៉ាហ៊ូ ដែលបច្ចុប្បន្នមានវ័យ ៧១ឆ្នាំ បានកាន់តំណែងនាយករដ្ឋមន្ត្រីអ៊ីស្រាអែល ១២ឆ្នាំជាប់គ្នា ពោលគឺយូរជាងអ្នកណាទាំងអស់ នៅក្នុងប្រវត្តិសាស្ត្ររដ្ឋអ៊ីស្រាអែលទំនើប៕PP