អ៉ីស្រាអែល៖ លោក Naftali Bennett បានស្បថចូលកាន់តំណែង ជានាយករដ្ឋមន្រ្តីថ្មី របស់ប្រទេសអ៉ីស្រាអែល កាលពីថ្ងៃអាទិត្យ បន្ទាប់ពីទទួលបានសំឡេងគាំទ្រដ៏តិចតួចបំផុតគឺ ៦០ ទល់នឹង ៥៩សំឡេង ហើយជ័យជំនះរបស់លោក គឺជាការបញ្ចប់អំណាចគ្រប់គ្រងរយៈពេលជាង១២ឆ្នាំ របស់អតីតនាយករដ្ឋមន្ត្រី Benjamin Netanyahu ដែលជាមេដឹកនាំកាន់អំណាចដ៏យូរជាងគេបង្អស់របស់អ៉ីស្រាអែល។នេះបើតាមការចុះផ្សាយដោយBBC។
សូមបញ្ជាក់ថា កាលពីថ្ងៃអាទិត្យ ទី១៣មិថុនា សភាអ៊ីស្រាអែល នឹងបើកសម័យប្រជុំពិសេសមួយ ដើម្បីបោះឆ្នោតផ្តល់សេចក្តីទុកចិត្ត ដល់រដ្ឋាភិបាលថ្មី ដែលនឹងត្រូវដឹកនាំដោយនាយករដ្ឋមន្ត្រី២នាក់ ផ្លាស់វេនគ្នា ១៨ខែម្នាក់។
រដ្ឋាភិបាលថ្មី នឹងដឹកនាំដោយនាយករដ្ឋមន្ត្រី២នាក់ ផ្លាល់វេនគ្នា គឺលោក Naftali Bennett មកពីគណបក្សស្តាំនិយម Yamina ដែលនឹងដឹកនាំរដ្ឋាភិបាល១៨ខែដំបូង បន្ទាប់មកទៀត គឺលោក Yair Lapid មកពីបក្សកណ្តាលនិយម ដែលនឹងមកធ្វើជានាយករដ្ឋមន្ត្រី១៨ខែបន្ទាប់។
ក្រោយការបោះឆ្នោតនៅខែមីនា អ៊ីស្រាអ៊ែលបានជាប់គាំងនយោបាយ ដោយសារតែគ្មានគណបក្សណាមួយ បានសម្លេងភាគច្រើនក្នុងសភា។ ការចរចានយោបាយ បានចាប់ផ្តើមឡើងយ៉ាងសស្រាក់សស្រាំ ដោយលោកប៊ីនយ៉ាមីន ណេតាន់យ៉ាហ៊ូ បានព្យាយាមអូសទាញគេឯង ឲ្យចូលរួមបង្កើតរដ្ឋាភិបាលចម្រុះជាមួយខ្លួន។ តែទីបំផុត លោកណេតាន់យ៉ាហ៊ូ និងគណបក្សលីគូត ត្រូវបានអ្នកនយោបាយផ្សេងៗទៀត បោះបង់ចោល ហើយងាកទៅផ្គុំគ្នាដាច់ដោយឡែក ដើម្បីរារាំង មិនឲ្យលោកណេតាន់យ៉ាហ៊ូ បន្តតំណែងជានាយករដ្ឋមន្ត្រី៕PP
