មីយ៉ាន់ម៉ា៖ អង្គការសហប្រជាជាតិបានបញ្ជាក់ថា យ៉ាងហោចណាស់មានមនុស្ស ៣៨ នាក់ត្រូវបានសម្លាប់នៅក្នុងប្រទេសមីយ៉ាន់ម៉ានៅថ្ងៃពុធនេះ ដែលជាថ្ងៃនៃអំពើហិង្សាដ៏អាក្រក់បំផុតចាប់តាំងពីការតវ៉ាប្រឆាំងនឹងការគ្រប់គ្រងរបស់យោធាបានចាប់ផ្តើម។

កម្លាំងសន្តិសុខបានបើកការបាញ់ប្រហារទៅលើហ្វូងមនុស្សយ៉ាងច្រើននៅក្នុងទីក្រុងមួយចំនួន ហើយយ៉ាងហោចណាស់ក្នុងចំណោមជនរងគ្រោះពីរនាក់ត្រូវបានគេជឿថាជាក្មេងវ័យជំទង់។

លោក Christine Schraner Burgener អ្នកតំណាងរបស់អង្គការសហប្រជាជាតិប្រចាំនៅប្រទេសមីយ៉ាន់ម៉ា បានពិពណ៌នានៅថ្ងៃពុធថាជា “ថ្ងៃបង្ហូរឈាមបំផុត” ចាប់តាំងពីរដ្ឋប្រហារបានកើតឡើងនៅថ្ងៃទី ១ ខែកុម្ភៈ។ លោកស្រីបន្តថា មានមនុស្សជាង ៥០ នាក់បានស្លាប់ចាប់តាំងពីពេលនោះមក។

ទោះបីជាមានការថ្កោលទោសកាន់តែខ្លាំងឡើងពីសំណាក់យោធាក៏ដោយ ក៏យោធាបានបង្កើនការឆ្លើយតបរបស់ខ្លួនចំពោះការតវ៉ាតាមដងផ្លូវ ហើយថ្ងៃពុធនេះមានការប៉ះទង្គិចគ្នាដោយហិង្សានៅក្នុងតំបន់មួយចំនួន។ សាក្សីបានប្រាប់ទីភ្នាក់ងារព័ត៌មានថា កម្លាំងសន្តិសុខបានបើកការបាញ់ប្រហារនៅក្នុងទីប្រជុំជន និងទីក្រុងជាច្រើនដោយការព្រមានតិចតួច។

យ៉ាងហោចណាស់មនុស្ស ៤ នាក់ត្រូវបានបាញ់សម្លាប់ក្នុងពេលតវ៉ាមួយនៅក្រុង Monywa ភាគកណ្តាលប្រទេសមីយ៉ាន់ម៉ា។ អ្នកកាសែតក្នុងស្រុកម្នាក់បានប្រាប់ថា យ៉ាងហោចណាស់មានមនុស្ស ៣០ នាក់ផ្សេងទៀតបានរងរបួសនៅក្នុងភាពចលាចលនេះ។

ការស្លាប់បន្ថែមទៀតត្រូវបានគេរាយការណ៍នៅក្នុងទីក្រុង Yangon, Mandalay និង Myingyan។ ទីភ្នាក់ងារ AFP បានរាយការណ៍ថា មនុស្ស ១៩ នាក់បានរងរបួសបន្ទាប់ពីការតវ៉ាមួយនៅជាយក្រុងយ៉ាំងហ្គោន។

ពេទ្យស្ម័គ្រចិត្តម្នាក់បានប្រាប់ទីភ្នាក់ងារសារព័ត៌មាន AFP នៅទីក្រុង Myingyan ថា មនុស្សយ៉ាងតិច ១០ នាក់បានរងរបួសនៅទីនោះ។ ពួកគេបាននិយាយថា “ពួកគេបានបាញ់ឧស្ម័នបង្ហូរទឹកភ្នែក គ្រាប់កាំភ្លើងជ័រ និងគ្រាប់មូលៗ។ បាតុករម្នាក់នៅក្នុងទីក្រុងក៏បានប្រាប់ថា “ពួកគេមិនបានបាញ់យើងដោយកាណុងបាញ់ទឹកទេ ហើយក៏គ្មានការព្រមានដើម្បីបំបែកដែរ ពួកគេបានបាញ់កាំភ្លើង” ។