ប៉ូលីសនៅក្នុងប្រទេសហូឡង់បានចាប់ខ្លួនក្រុមពាលគ្រឿងញៀនដ៏ធំបំផុតមួយនៅលើពិភពលោកតាមដីកាដែលចេញដោយប្រទេសអូស្ត្រាលី។ Tse Chi Lop ជាជនជាតិកាណាដាដើមកំណើតចិន ត្រូវបានគេនិយាយថាជាប្រធានក្រុមហ៊ុនដែលគ្រប់គ្រងទីផ្សារគ្រឿងញៀនខុសច្បាប់ចំនួន ៧០ ពាន់លានដុល្លារនៅទូទាំងទ្វីបអាស៊ី ដោយត្រូវបានគេចាត់ថាជាជនរត់គេចខ្លួនត្រូវគេតាមចាប់ ហើយឥឡូវត្រូវបានគេឃុំឃាំងនៅឯអាកាសយានដ្ឋាន Schiphol នៃទីក្រុង Amsterdam ។
ឥឡូវនេះ ប្រទេសអូស្ត្រាលីនឹងស្វែងរកការធ្វើបត្យាប័នរបស់ជននេះដើម្បីប្រឈមមុខនឹងការជំនុំជម្រះនៅទីនោះ។ប៉ូលីសសហព័ន្ធអូស្រ្តាលី (AFP) ជឿថាក្រុមហ៊ុនដែលត្រូវបានគេស្គាល់ថាជា Sam Gor Syndicate ទទួលខុសត្រូវរហូតដល់ ៧០ ភាគរយនៃគ្រឿងញៀនខុសច្បាប់ទាំងអស់ដែលចូលក្នុងប្រទេស។
បុរសវ័យ ៥៦ ឆ្នាំរូបនេះត្រូវបានគេប្រៀបធៀបទៅនឹងម្ចាស់គ្រឿងញៀនម៉ិកស៊ិក Joaquin "El Chapo" Guzman ដោយសារតែទំហំនៃសហគ្រាសដែលត្រូវបានគេចោទប្រកាន់។ប៉ូលីសអូស្រ្តាលីត្រូវបានគេរាយការណ៍ថា បានតាមដាន Tse អស់រយៈពេលជាងមួយទសវត្សរ៍មុនពេលជននេះត្រូវបានចាប់ខ្លួនកាលពីថ្ងៃសុក្រ ខណៈដែលកំពុងឡើងយន្តហោះទៅប្រទេសកាណាដា។
សេចក្តីថ្លែងការណ៍របស់ប៉ូលីសបាននិយាយថាដីកាចាប់ខ្លួនត្រូវបានចេញនៅឆ្នាំ ២០១៩ ដោយប៉ូលីសហូល្លង់ធ្វើសកម្មភាពតាមសេចក្តីជូនដំណឹងរបស់ប៉ូលីសអន្តរជាតិ។អ្នកនាំពាក្យប៉ូលីសហូឡង់បាននិយាយថា “ជនរូបនេះស្ថិតនៅក្នុងបញ្ជីខ្មៅជនឧក្រិដ ហើយ ត្រូវបានឃុំខ្លួនដោយផ្អែកលើរបាយការណ៍ដែលយើងបានទទួល” ។
ទីភ្នាក់ងារសារព័ត៍មាន Reuters បានផ្សាយការស៊ើបអង្កេតពិសេសមួយលើ Tse ក្នុងឆ្នាំ ២០១៩ ដោយបានពណ៌នាជននេះថាជា “បុរសដែលចង់ចាប់ខ្លួនខ្លាំងបំផុតនៅអាស៊ី”។ទីភ្នាក់ងារសារព័ត៌មានបានដកស្រង់ការប៉ាន់ស្មានរបស់អង្គការសហប្រជាជាតិដោយនិយាយថា ប្រាក់ចំណូលរបស់ក្រុមប្រមូលពីការលក់មេតំហ្វេតាមីន (methamphetamine) តែម្នាក់ឯងអាចមានចំនួនរហូតដល់ ១៧ ពាន់លានដុល្លារក្នុងឆ្នាំ ២០១៨ ។
យោងតាមទីភ្នាក់ងារសារព័ត៌មាន Reuters ដដែលបានឲ្យដឹងថា កិច្ចប្រឹងប្រែងដើម្បីចាប់ខ្លួន Tse Chi Lop ប្រតិបត្តិការដោយទីភ្នាក់ងារប្រមាណជា ២០ ក្រុមមកពីទ្វីបនានានៅទូទាំងពិភពលោក ដោយទីភ្នាក់ងារ AFP ជាអ្នកដឹកនាំ។
គួរបញ្ជាក់ផងដែរថា Tse ត្រូវបានគេនិយាយថាបានផ្លាស់ប្តូរទីតាំងរវាងម៉ាកាវ ហុងកុង និងតៃវ៉ាន់ក្នុងរយៈពេលប៉ុន្មានឆ្នាំចុងក្រោយនេះ។ បុរសនេះធ្លាប់ជាប់ពន្ធនាគាររយៈពេល ៩ ឆ្នាំបន្ទាប់ពីត្រូវបានចាប់ខ្លួនពីបទជួញដូរគ្រឿងញៀននៅសហរដ្ឋអាមេរិកក្នុងទសវត្សឆ្នាំ ១៩៩០ ។ ប្រព័ន្ធផ្សព្វផ្សាយអូស្រ្តាលីបានពណ៌នាការចាប់ខ្លួនបុរសរូបនេះថា "សំខាន់បំផុត" សម្រាប់ក្រុមប៉ូលិសសហព័ន្ធរបស់ប្រទេសក្នុងរយៈពេលពីរទសវត្សរ៍នេះ។
