សភាអាមេរិក អនុម័តច្បាប់អនុញ្ញាតឲ្យរដ្ឋបាលលោក Biden ខ្ចី ឬជួលអាវុធទៅ អ៊ុយក្រែន និងបណ្តាប្រទេសអឺរ៉ុបខាងកើតផ្សេងទៀត ខណៈលោកប្រធានាធិបតី Biden ជំរុញឲ្យសភាអនុម័តកញ្ចប់ជំនួយក្នុងទំហំទឹកប្រាក់ ៣៣ពាន់លានដុល្លារភ្លាមៗសម្រាប់អ៊ុយក្រែន
(អាមេរិក)៖សភាអាមេរិក បានអនុម័តច្បាប់អនុញ្ញាតឲ្យរដ្ឋបាលលោក Biden ខ្ចី ឬជួលអាវុធទៅ អ៊ុយក្រែន និងបណ្តាប្រទេសអឺរ៉ុបខាងកើតផ្សេងទៀត។ច្បាប់នេះត្រូវបានដាក់ឈ្មោះ សម្រាប់កម្មវិធីសម័យសង្គ្រាមលោកលើកទី២ ដែលបានជួយផ្គត់ផ្គង់សម្ព័ន្ធមិត្ត ក្នុងការប្រយុទ្ធប្រឆាំងនឹងពួកណាស៊ីអាល្លឺម៉ង់។នេះបើតាមសេចក្តីរាយការណ៍ដោយទីភ្នាក់ងារសារព័ត៌មាន BBC នៅថ្ងៃសុក្រទី២៩ ខែមេសា ឆ្នាំ២០២២នេះ។
កម្មវិធីខ្ចី-ជួលសម័យសង្គ្រាមលោកលើកទី២ ត្រូវបានគេមើលឃើញថា ជាឧបករណ៍សំខាន់ដែលនាំមកនូវជ័យជម្នះដល់សម្ព័ន្ធមិត្ត ប្រឆាំងនឹងពួកណាស៊ីអាល្លឺម៉ង់។កម្មវិធីនេះ អនុញ្ញាតឲ្យរដ្ឋាភិបាលសហរដ្ឋអាមេរិកខ្ចី ឬជួលគ្រឿងផ្គត់ផ្គង់សង្រ្គាម ជាជាងលក់ទៅឲ្យប្រទេសណាមួយដែលចាត់ទុកថាមានសារៈសំខាន់សម្រាប់ការការពាររបស់សហរដ្ឋអាមេរិក។ ជំនួយជាពិសេសនេះ បានជួយចក្រភពអង់គ្លេសក្នុងការប្រយុទ្ធជាមួយពួកណាស៊ីអាល្លឺម៉ង់។
ការអនុម័តច្បាប់នេះ កើតឡើងចំពេលដែលលោកប្រធានាធិបតី Biden ជំរុញឲ្យសភាអនុម័តកញ្ចប់ជំនួយក្នុងទំហំទឹកប្រាក់ ៣៣ពាន់លានដុល្លារភ្លាមៗសម្រាប់អ៊ុយក្រែន ខណៈដែលទីក្រុងកៀវ នៅតែបន្តរារាំងការវាយប្រហាររបស់ប្រធានាធិបតីរុស្ស៊ីលោក Vladimir Putin។
ប្រធានាធិបតីសហរដ្ឋអាមេរិក លោក ចូ បៃដិន បានស្នើទៅសភាសម្រាប់ថវិកាចំនួន៣៣ប៊ីលានដុល្លារបន្ថែមទៀតដើម្បីគាំទ្រដល់ប្រទេសអ៊ុយក្រែនដែលកំពុងមានជម្លោះជាមួយប្រទេសរុស្ស៊ី។ មួយផ្នែកដ៏ធំនៃកញ្ចប់ថវិកាដ៏មហាសាលត្រូវបានកំណត់សម្រាប់ជំនួយយោធា និងសន្តិសុខ ខណៈចំណែកប្រាក់ផ្សេងទៀតនឹងត្រូវប្រើជាជំនួយសេដ្ឋកិច្ច និងមនុស្សធម៌។សេចក្តីថ្លែងការណ៍របស់សេតវិមានបាននិយាយថា ៖«រដ្ឋបាលប្រធានាធិបតី ចូ បៃដិន បានកំពុងស្នើថវិកាចំនួន២០.៤ប៊ីលានដុល្លារបន្ថែមទៀតក្នុងជំនួយយោធា និងសន្តិសុខសម្រាប់អ៊ុយក្រែន ហើយការប្រឹងប្រែងរបស់អាមេរិកគឺដើម្បីពង្រឹងសន្តិសុខអឺរ៉ុបក្នុងកិច្ចសហប្រតិបត្តិការជាមួយសម្ព័ន្ធមិត្តណាតូ និងដៃគូផ្សេងៗទៀតក្នុងតំបន់»។
ការបង្ហាញសំណើថវិកាអំឡុងពេលសុន្ទរកថានៅសេតវិមា លោកប្រធានាធិបតី ចូ បៃដិន មានប្រសាសន៍ថា វាសំខាន់សម្រាប់សមាជិកសភាអនុម័ត។ លោកមានប្រសាសន៍ថា ៖«យើងត្រូវការអនុម័តថវិកាដើម្បីគាំទ្រអ៊ុយក្រែន និងការប្រយុទ្ធរបស់អ៊ុយក្រែនដើម្បីសេរីភាព»។
លោកទទួលស្គាល់ថា ៖«តម្លៃមិនថោកទេ ប៉ុន្តែការបង្ខំឲ្យការឈ្លានពានចេះតែបន្តនោះ គឺកាន់តែថ្លៃខ្លាំងឡើង ដូច្នេះថាតើយើងនឹងអនុញ្ញាតឲ្យវាកើតឡើងទេ»។ រដ្ឋបាលរបស់លោកត្រូវការកញ្ចប់ជំនួយនេះត្រូវកំណត់ជាការចំណាយគ្រាអាសន្ន។
អាមេរិកតែឯងបានផ្តល់ជំនួយជាង៣ប៊ីលានដុល្លារអាមេរិកលើជំនួយយោធាដល់អ៊ុយក្រែនចាប់តាំងពីសង្គ្រាមបានផ្ទុះឡើងកាលពីចុងខែកុម្ភៈ។ សម្ព័ន្ធមិត្តរបស់អាមេរិកផ្សេងទៀតក៏បានផ្តល់ជំនួយផ្នែកសេដ្ឋកិច្ច និងយោធាដែរដល់រដ្ឋាភិបាលក្រុងកៀវដែរ។
មន្ត្រីជាន់ខ្ពស់របស់ប្រទេសលោកខាងលិចមានដូចជាលោកនាយករដ្ឋមន្ត្រីអង់គ្លេស Boris Johnson និងទូតកំពូលរបស់អឺរ៉ុប លោក Josep Borrell បានថ្លែងជាបើកចំហថា ពួកគាត់ចង់ឲ្យអ៊ុយក្រែនផ្តួលរុស្ស៊ីនៅសមរភូមិ៕PP
